Aizawl: Bill an pek theih loh avanga kawlphetha tihtawpsak, Tawngtai Bethel Camping Centre, Sakawrtuichhun hnenah P&E Minister R Lalzirliana’n bill ba rulhna tur Rs nuai 5 a hlan a, a thupek angin kawlphetha pawh pek chhunzawm nghal an ni.
TBCC hian kawlphetha hman man an pek theih loh avangin an hman lai chu department-in a tihtawpsak a, hemi chungchangah hian Central YMA inrawlhin an ngenna angin P&E minister hian Thawhlehni kha TBCC hi a tlawh a ni.
P&E minister hian Minister of State Dr K Beichhua nena an thawh dun bill ba rulhna tur Rs nuai 5 chu TBCC enkawltute hnenah hian a hlan a, electric lo disconnect tawh pawh re-connect leh nghal turin department hotute thu a pe nghal a, hemi ni atang hian TBCC-ah hian êng chhit leh theih a ni.
Amah tawiawmtu Central YMA hruaitute leh TBCC enkawltute hmaah thu sawiin P&E minister chuan TBCC-in harsatna an neihte chu a sutkianpui theitu tur dik tak department hotute hnenah thlen hmasa thin se a duh thu a sawi a, harsatna an tawhte politics-a inchirhtheh nana hmang mai loa tu pawh sorkar se, sorkar hotute nena thawhho dan zir thar a pawimawh a tih thu a sawi.
P&E minister hian kawlphetha hman man pek theih loh a awm tawh lohna turin TBCC connection leh load hrang hrang awm dante chu P&E department-a thawktute nen en chianga ruahmanna siam a nih tur thu sawi bawkin, department hnathawktute chu lo thawhpui thiam turin TBCC enkawltute a chah a ni.