French champion Paris St-Germain chuan defender Nordi Mukiele chu RB Leipzig atangin kum nga chhung atan an lalut.
France international hian Germany-ah kum li chhung a inkhel hman a. Hemi hma hian French club Montpellier-ah a khel thin. Germany-ah a inkhelh chhungin Leipzig tan hian German Cup-ah vawikhat a champion hman a. Final vawikhat dang thlenpui bawkin Europa League semi-final an thlenna kawngah tha a thawh ve bawk.
Bundesliga club tan hian match 145 a khel a, goal 10 khungin assist 11 a nei. Kum 24 mi hi Chelsea pawhin an tlarhnung a khel turin an duh a, mahse Paris khaw club chu lalut turin an el pha lo.
Mukiele hian France tan Under-18 atang age group inelnaah a khel chho kim vek a, kum 2021 September thla khan World Cup qualifier-ah Finland hmachhawnin ram tan a vawikhat nan senior football a khel.
Right-back a chhawr thin Mukiele hi centre-back ah pawh harsatna nei miah lova chhawr theih a ni a. PSG in tun nipui a player an lakluh pathumna a ni a. Portuguese midfielder Vitinha leh loan a an hawh hmasak phawt French striker Hugo Ekitike te hnung a zui.
Manager thar hristophe Galtier enkawlna hnuaia player an lakluh pahnihna a ni a. “RB Leipzig hnenah lawmthu ka sawi a, ka tana in inpekna engkim ka hre reng tawh ang. A ni khatna atangin in hnenah ka inpui ang mai a ngaihtheihin min lo lawm lut a, tunah pawh hian chhuahsan che u a huphurhawm ka ti. Nitin kan tum ram kan thlenna tura kan beihna kawnga ka thawhpui thinte zawng zawng chungah lawmthu ka sawi.” a ti.
PSG hian centre-back Presnel Kimpembe chu chhuak tur anga sawi a nih avangin Mukiele hi a hmunruak luah thei tur a nih avangin lakluh an thlang.