Kar tir lama vauna na zawk a dawn hnuah Russia chuan Germany leh Europe khawmualpui lailia boruakalhthei a pek luh thin chu a titawp a, nasa takin a man a ti phah.
Europe-ah hian boruakalhthei hi 9% zetin a man a sang a, Russia-in Ukraine a rûn tirh lama a man san ber lai a tawn ang kha a phak thuak.
Mi tam tak chuan Russian sorkar hian a boruakalhthei neih chu politics hmanrua atan a hmang niin an sawi.
Russia hian Nord Stream 1 pipeline hmanga Germany-a a thawn luh thin tam tak titlemin a pangngaia a thawn chhuah thin hmun ngaa thena hmun khat ang vel chauh a ni mek.
Germany hian boruakalhthei a hman zing 55% zet hi Russia atanga a lak luh niin a tam ber hi Nord Stream 1 hmanga a lak luh a ni a, a dangte hi khawmuala pipeline kal atanga a lakte an ni.
Russian energy firm Gazprom chuan boruakalhthei thawn chhuah an tihtlem chu tih loh hram an duh a; mahse, turbine siam that an ngaih vangin a pangngai an pha lo niin an sawi.
German sorkar erawh chuan khawl leh thil dang siam that ngai awm a awm lo niin an sawi ve thung.
Ukraine chuan Moscow hian Europe lakah ‘gas war’ a kalpui nia puhin, a pek tlem chu mipuite laka firfiaka chetna niin a sawi.
UK chu Russia-in boruakalhthei a thawn chhuah tlemin a tibuai ve lem lo va, ram dang atanga a lak luh zinga 5% pawh tling mang lo chauh Russia atang hian a la ve a. Hetih rual hian Europe-a mamawhna a san chuan khawvel pumah a man a to thei dawn a, chu chu an tuar ve thei tho.
Nilainiah khan UK-ah hian boruakalhthei man chu 7%-in a to va, nikum tun ang hun aiin a let ruk dawnin a to zawk a, Russia-in Ukraine a rûn tirh lai ai erawh chuan 20%-in a la tlawm zawk tho.
Tun tuma boruakalhthei an lak luh tihtlem a nih hian EU ramte chu nakin zela Russia-a innghah lutuk loh a thatna a kawhhmuh mek a, thlasik lo thleng tur atan lakna dang dap thuai thuai erawh an ngai hle.
Moscow-in Ukraine a rûn tirh phah European hruaitute chuan tuialhthei leh boruakalhtheia Russia-a an innghah thinna chu tihtlem hret hret dan an la dap char char.
Thawhlehni khan European Union chuan Russia atanga an lak luh theih zat tihtlem a nih thuta boruakalhthei hman tlem deuh dan tur ruahmanna an lo pawm tawh a, ram thenkhat erawh an dan turah ngaihhnathiam an ni.
EU member ramte hian August leh nakum March thla inkarah an boruakalhthei hman thin chu 15% theuhva tihtlem an tum.
Hetianga ruahmanna an siam chhan ber hi boruakalhthei an neih sate renchem leh thlasik lo thleng tur atana lo khawlna tur a nih thu EU chuan a sawi a, ‘Russia hian energy a pek chhuah thin chu hmanrua atan a la hman chhunzawm reng’ niin an sawi bawk.
EU ramten boruakalhthei hmang tlem tura inremna an neih hi mahni duhthua intiamna a ni a; mahse, a chawk luhna lam a buai zual chuan tih ngei ngei tur anga an kalpui a la tul thei dawn.
EU hian May thla khan tuipui kaltlanga Russian tuialhthei an lak luh thin chu kumin kum tawpa tihtawp vek an tum a, boruakalhthei lak luh tihtawp hun tur erawh hun rei zawk la kalpui tur a ni.
Russia-in February-a Ukraine a rûn atang khan wholesale-a boruakalhthei hralhna man pawh a to a, khawvel pumah a hmangtuten pawisa an chawi thin (consumer energy bill) pawh a san phah a ni.
Kremlin chuan a man to chhanah hian khawthlang ramten an ram an hrek chu a puh a, energy lama kawppui rintlak a ni a, tun hnaia boruakalhthei pek chhuah a buaiah hian mawh an phur lo niin a sawi.