AIZAWL: NHIDCL-in kawng an siamna leivung paihin environment a tihchhiat chung chang enpui tura ruat state level committee-in NHIDCL contractor ten an remchan dan ang apianga leivung an paih mai nia lang chuan ram leilung leh lui nasa takin a tichhia tih chu an hmuh dan a nih thu an sawi.
State level committee chuan NHIDCL chu an contractor dan bawhchhia te lakah hremna lekin, tun hnuah leivung paihna hmun tura ruat, dan ang taka buatsaihah chauh leivung paih tawh turin an ti a. NHIDC executive director pawhin, thla 2 hun pe tura ngenin, chumi chhunga theihtawpa hma la turin a intiam.
NHIDCL-in mimal ram leh reserve forest inbukthuah nia a lan vanga compensation lam an tihfel mai theih loh thu leh Forest department atanga hna thawh phalna an dil an hmuh har avanga harsatna an tawh te he thutkhawmah hian an sawi a. Committee chuan compensation leh Forest clearance chungchang chu a rang lamin a mawhphurtu ten tifel se, an ti bawk.