North Korea hruaitu, Kim Jong-un chuan sipai chakna hmanga United States nena inep turin an ram chu a inpeih reng tih a sawi.
Korean War champha hmannaa thu a sawinaah Kim-a chuan nuclear ralthuam hmanga inbeihna erawh thlen lohtir a duh tih a sawi bawk niin an sorkar news agency KCNA chuan a tar lang.
Kim-a’n hetiang thu a sawi hi North Korea-in a vawi sarih nan nuclear ralthuam enchhin leh tuma a inbuatsaih lai mek a ni.
US chuan thla hmasaah tawh khan Pyongyang hian engtik hunah pawh enchhinna a kalpui thei reng tiin a lo sawi lawk tawh.
North Korea-in nuclear a enchhin hnuhnung ber chu kum 2017 kha a ni a. Tunah hian Korean peninsula-ah boruak a tang thar leh mek.
US special representative to North Korea Sung Kim chuan North Korea hian kuminah missiles vawi 31 zet a enchhin tawh a, kum 2019 kha kum khata a enchhin tam ber niin vawi 25 a enchhin a, hei hi kuminah hian a khum der tawh tih a sawi.
An thenawmin an ralthuam an enchhian sek chhan let nan June thla khan South Korea pawhin missile pariat lai a enchhin ve bawk.
1950-53 Korean War kha inrintawnna hmanga tihtawp a ni a, North Korea chuan US lakah hnehna an chang niin a inchhal a. Kum tin ‘Victory Day’ an lawm thinah hian sipai kalrem lâm, halmawi leh lâm nen hun an hman thin.
Thu a sawinaah Kim chuan US-in nuclear ralthuam hmanga a tihthaihna avangin North Korea chuan hmanhmawh taka chet a lak ve leh a inven vena tur a tuk a ngai niin a sawi.
US hian North Korea-in sipai lama hma a lakna chu boruak siam nan a dik lo zawngin a la thin niin a sawi bawk.
Kim hian South Korea pawhin North Korea-in nuclear hmanga a tihthaihna chhangin a kap chhin ve niin a sawi bawk.
‘Kill Chain’ strategy tia an sawi mai South Korea-in kum 10 liam tawhah an hman tan kha a ni a, Pyongyang-in missiles leh an hruaitu lawkten an tihthaih hmaa lo tihthaih khalh an kalpui dan a ni.
He thil hi tha tho mah se mi thiamte chuan boruak lian zawk a siam theih avangin hlauhawm a, ralthuam lama intlansiakna nasa tak a thlen thei bawk niin an ngai.
Victory Day lawmnaah hian Kim-a chuan South Korean President Yoon Suk-yeol-a sorkar leh a sipaiten intihthaih nana thil a ti a nih chuan ‘hlauh ruk a nei’ a nih thu a sawi nghe nghe.