Tun laia West Bengal-a hna lak thubuai leh minister hial pawhin a bân phahna, ni ta hi kum 2014 daih tawha West Bengal School Service Commission (SSC) -in State Level Selection Test (SLST) hmanga sorkar sikula thawk tur zirtirtu lakna tur hriattirna a chhuah atanga intan a ni.
Hna lakna hi kum 2016 khan kalpui tan niin hetih lai hian Partha Chatterjee hi Higher Education leh School Education Department changtu minister a nih lai a ni a. Hna lak kalpui danah hian thil dik tawk lo tam tak a awm nia puhna leh chhui chian phutna eng emaw zat chu Calcutta High Court-ah thehluh a ni zui ta a ni.
Petitioner tam tak chuan merit list-a chuang zingah an hnuaia mite aia mark hmu tlem zawk an awm niin an sawi a. Mi thenkhat chuan merit list-a lang lo, he hnaa tling tho tam tak awmin appointment letter pawh an dawng niin an sawi bawk.
July 23 khan tuna Commerce & Industry minister ni mek, Chatterjee leh a lamhnai, Arpita Mukherjee chenna chu dap a ni a. ED chuan Chatterjee leh Paresh Adhikari bakah mi dang in an dapnaah Rs vaibelchhe 20 zet Arpita Mukherjee inah hian an man a. Mobile phone pawh 20 vel lai an hmu chhuak bawk a ni.