Formula 1 chanchin a driver hlawhtling leh ropui Sebastian Vettel chuan tun season zawhah F1 a chawlhsan dawn a. Vawi li world champion ni tawh hian a chawlh tur thu Ningani khan a puang.
Kum 35 mi hian thutlukna siam awlsam a ni lova, hun engemaw chen chhung a ngaihtuah tawh a nih thu a sawi a. A chhungte bula hun hman tam zawk a duh a, a hmalam hun thlir tel chunga thutlukna siam a nih thu a sawi.
“Vawiin hi in mangtha na lam a ni lo. Lawmthu inhrilhna tur zawk a ni. F1 mi leh sa zawng zawngte bakah fans te zawng zawng hnenah lawmthu ka sawi a. In zavai tel lo hian he infiamna hi a awm dawn lo.”
“Tunhnaiah kan result te tha lo mahse kan hmalam hun atana dinhmun tha zawka kan awm theihna turin tunhnai kum chhungin hna kan thawk a, ka hun tawp thleng hei hi ka chhunzawm ang.” tiin a sawi.A ropui e!
Formula 1 a a season 16-na hmang mek Vettel hian Grand Prix 53-ah pakhatna a hauh tawh a. F1 chanchinah Lewis Hamilton leh Michael Schumacher te chiah a tluk lo. Anni pahnih bakah Juan Manuel Fangio te chiahin world title nei tam zawkin German driver hi kum 2010 atanga 2013 chhungin a zawnin vawi li a champion.
Kum 2011 leh 2013-ah inelna a thunun tluan zak a, kum 2013 season chawhnu lamah a zawna vawi 9 hnehna changin a fal hle.
Kum 2010 leh 2012-ah erawh champion turin a beih nasat a ngai a. A world title hmasa ber lak tumin a teammate Mark Webber bakah Fernando Alonso leh Lewis Hamilton te nen an inelna boruak a sang.
Red Bull a chhuahsan hnuah Ferrari zawmin Lewis Hamilton eltu a ni thin a, nimahsela world title a la zui tawh lo. Tunhnai kum hnih chhungin Aston Martin a zawm a, hmasawn tum team tana driver pawimawh a nih rualin intlansiakah result tha an nei zing tawk thin lo.