Aizawl: Khawthlang Tuipui Group YMA-in Lunglei to Tlabung National Highway 302 kawng chhia avanga nunna chân tate hnena zangnadawmna pe turin kawng siamtu, NHIDCL an phut a, helai kawngpui chhe lai hi ni hnih chhunga siam tha turin an phut bawk.
Nimin zing khan Khawthlangtuipui Group YMA OB, Tlabung, Zodin leh Chawnpui branch OB ten Lunglei - Tlabung NH 302 kawng chhe lutuk chungchangah emergency joint meeting an nei a, kawng chhia vanga July 25-a truck accident-a boral ta driver, Lalmalsawma, Lunglei Ramthar leh July 27-a helai kawnga lirthei tang nam a tumna lama kawng thlanga tla hlum, R. Lalthantluanga, Chhipphir khua te chu zangnadawmna pe ngei turin NHIDCL chu an phut.
Helai kawng an laih meka, a chhe lai te chu July ni 28 leh ni 29- chhunga siam tha turin NHIDCL te chu an phut bawk a, hun bi an tuk chhunga an siam tha lo anih chuan an bungrua leh an chungah engpawh thleng se mawh an phurh loh tur thu an sawi a ni.
An thukhawm chungchanga thuchhuah an siamah hian July 30, 2022 khian Khawtlangtuipui Group YMA hnuaia branch hrang hrangte leh truck/pick up owners leh Maxi Cab Welfare Tlabungten kawng chhe siam hnatlangpui an nei dawn tih an tar lang bawk.