Aizawl: Champhai District NGO Co-Ordination Committee chuan Champhai District Hospital-a RT-PCR khawl bunsak thuai turin Mizoram sorkar an ngen.
Nimin an thuchhuahah Champhai District NGO Co-Ordination Committee chuan Champhai District Hospital-a RT-PCR khawl bun tura hmalak bul tanna a rei tawh viau laiin vawiin thlenga bun a la ni lo chu pawi an tih thu an sawi a. RT-PCR khawl bun puitlin a neih theihna tura chak zawka hma la tur leh, Champhai District Hospital kianga TRAUMA Centre chu a nihna tur anga tipuitling thuai turin Mizoram sorkar an ngen tih an sawi.
Champhai District NGO Co-Ordination Committee chuan Champhai khawpui tana municipal council din tura an ngenna tihhlawhtlinsak thuai tur te, Champhai khawpuiah hun rei tak atang tawhina mobile phone hmanga inbiakpawhna chungchangah harsatna an tawk reng chu service provider-te inthlahdah vang nia hriain service tha zawk pe tur leh inbiakpawhna kawnga harsatna an tawh mekte sutkiansak turin company an phut rualin sorkar thuneitute an ngen tih an sawi bawk.
Hei bakah hian kuthnathawktuten an buh leh bal chawmna tur lei chi (fertilizers) an mamawh em em laia Mizoram sorkarin lei chi lei tur a chhawpchhuak thei lo sorkarin lo neitu/kuthnathawktute hmakhua a ngaih pawimawh lohzia lantirnaah an ngai tih an sawi a, buh leh bal chawmna tur lei chi chu hrang hrang lei tur ngaihtuahsak turin Mizoram sorkar an ngen thu an thuchhhuahah an tar lang.