Aizawl: Commonwealth Games 2022 neih meka India tana gold medal chawi chhuaktu Mizo tlangval, Jeremy Lalrinnunga chu a hlawhtlinnaah political party hrang hrangin an lawmpui thu an sawi.
Mizo weightlifter, kum 19 mi hian Birmingham khawpuia Commonwealth Games 2022-ah India-in gold medal an lak pahnihna ni turin Pathianni khan men’s 67kg huangah gold medal a la.
Snatch-ah kg 140 chawiin Clean & Jerk-ah kg 160 a chawi a. Snatch-ah a chawi zawng leh a belhkhawma kg 300 a chawi hi Commonwealth Games record a ni.
MNF party chuan Jeremy Lalrinnunga chu thinlung takin an lawmpui thu leh an chhuan thu a sawi a. Hetiang dinhmun thleng thei tura a thawhrimna leh tumruhnate a ropui an tih thu leh gold medal la tura a rahbi tuksaktu zawng zawngte chungah lawmthu sawiin thuchhuah an siam a. Mizoram leh Mizo hnam tan dinhmun sang zawka a din zel theih nan duhsakna sang ber an hlan tih an sawi.
Thuchhuah an siamah Congress party chuan Jeremy Lalrinnunga chu an chhuan thu an sawi a. Gold medal a hlawh chhuah theihna tura theihtawp chhuahpuitu India sorkar leh an coach-te chungah lawmthu sawiin, a bul tanna atana ‘Catch Them Young’ policy hmanga kawng sah kuaksaktu, a hunlaia Sports Minister Zodintluanga te, sports council hotute leh hlawhtlinna ropui tak a chan theihna atana amah tanpuitu zawng zawngten chawimawi an phu takzet tih an tar lang.
BJP Mizoram Pradesh |halai Headquarters pawhin Jeremy Lalrinnunga chu an lawmpui thu leh an chhuan thu sawiin, Congress sorkar hun laia ‘Catch Them Young’ kaltlanga a tana kawng a inhawng tan kha lawmawm an tih thu an sawi a. Jeremy Lalrinnunga chu a phu ang tawka sum fai pe ngei turin Mizoram sorkar an phut tih an sawi.
Nimina PC Party hruaitu thutkhawmah Senior Vice President Vanlalruata chuan khawvel hriata Mizo hnam chawisangtu, Mizo tlangval, Jeremy Lalrinnunga a kal zelna turah duhsakna hlanin sport minister lo ni tawh thinte, infiamna lama pawl hrang hrang anga thahnemngai taka sul lo su thinte thawhrim rah Zofaten an seng chho zel chu a lawmawm a tih thu a sawi bawk.