A pension hnua sorkarin a rawih nawn, Cooperation department-a Additional RCS Lalrinsanga chuan department dangah pawh pension tawh rawih nawn an awm nual laia amah chauh dodal a nih chhan chu dan ang taka hna a thawh thinna ngai thei lotute hmalakna a nih thu a sawi.
Lalrinsanga chuan nimin khan a chenna inah chanchinbumi thenkhat a kawm a, a thawhna Cooperation department chu dan leh dun hnuaia hnathawk an ni a, dan hnuaia khawng taka hna a thawh ngai thei lotu cooperative society hruaitu zingah an awm thu sawiin, “Rawih nawn ka nihnaa min dodaltu, MZP-te hi min ngai thei lotute hian an hiat niin a lang,” a ti.
Society hruaitu thenkhatin an ngaih theih loh chhan sawifiahin, “Cooperative society-a hruaituten chanvo an chelh hun chhungah hian dan mumal tak a awm a, chairman leh board of director ten term hnih, kum 10 chhung an chanvo an chelh thei a, chumi hnuah erawh kum nga chhung inthlan an hmachhawn thei tawh lo,” a ti a, he dan paih bo duhtute hian dan anga a kalna chu an ngai thei lo ta tih a sawi.
Sorkarin a rawih nawn chungchang sawiin Rinsanga chuan a pension tawh hnuah ruai nawn leh turin sorkarah dilna a thlen lo tih sawiin, “Ka post kalsan chu luah thei mai tur an awm loh avang leh kan department dinhmunte hriain sorkar hotuten min rawn ruai nawn ta mai a, order chu May 25 khan tihchhuah a ni,” a ti.
Rinsanga chuan order a hmuh tirh khan inthlahrunna pawh a nei a, chutihrual chuan department dangah pawh pension rawih nawn an awm fo laia amah bik bituma dodal a ni chuan a titlawmngai a, sorkarin order a sut leh a nih ngawt loh chuan han inhnuhdawh tumna a nei lo tih a sawi bawk.