Pension rawih nawn thawm a lo ri leh a…
Mizoram sorkar chuan dodalna a awm chungin Cooperation deptt-a Addl. Registrar of Cooperative Societies (Addl. RCS) May thla a pension tawh chu a rawih nawn thu hriat a ni a, zirlai pawl lian ber MZP chuan hei hi an dodal nghal chat bawk.
MZP te hian thiamna bik em em nei pawh ni chuang lo, thalai hna zawng mek leh mi thiam tak tak an awm chunga pension rawih nawn leh a ni thin chu an duh lo thu sawiin, an pawl dinna a ngai reng a la nih thu an sawi a, tun tuma Addl. RCS pension tawh rawih nawn leh pawh hi an dodal thu an sawi bawk a ni.
Kan ramah thalai lehkhathiam hna hmu lo an tam em em a, tin, a thawksate ngei tan pawh kaisanna duhawm a awm laia pension tawh, thiamna em em an neih bik pawh hriat ni lo rawih nawn an ni thin hi a pawi a, sorkar pawh hian hemi kawngah hi chuan a mite hmakhua hi a ngaihthiam a tul tawh tak zet.
Zirlai pawl lamte pawh hi an dinnaah hian nghet takin ding zel mai se la, hun lo la kal zel turah thalai lehkhathiam zawkte hmakhua ngaiin an tuang tichhah tlat bawk teh se. Mipuiin anmahniah beiseina sang tak an nei si a.