- HC Vanlalruata
Mizote hi engemaw zawng takah chuan mahni kuang lo nawr hi kan tam awm mang e, tih chang a awm ţhin a, a bik takin sorkar, pawl leh kohhrante hian an uar zualin a lang. (Heta Mizovin ‘kuang’ kan tih hi ruang dahna hi ni lovin vawk chaw pekna ‘kuang’ a ni). Sorkar hi chuan a kuang lo a nawr aimahin ama kuang rawn nawrtute a lo hlahthlem satliah pawh ni lovin an thu a kawi a ngila a zawm ni a lang thin hi a huatthlala-awm zawk lai chu a ni awm e.
Kristiante innghahna lehkhabu chuan – ‘thuhriltu chuan hril tlat rawh se, zirtirtu chuan zirtir tlat rawh se’ tih hi a thupui a ni a. ‘Hnathawktu chu hlawh hmu tlak a ni’ a tih leh mai. Kan sorkar hnathawk tam tak hian an nupui/pasal fanau chawmna ber, an hna ai hian kohhran leh khawtlang a an inhmanna hi an ngai pawimawh fe zawk fo mai a. Zinga an ina kohhran hmeichhe committee emaw YMA thutkhawm emaw an nghat a nih chuan chawhnu dar 1-ah pawh pisa thleng sela inthiam lohna chhete mah an nei lo.
Ka thianpa pakhatin min hrilh chu, an inhnuai luah, an department-a sum lam khawihtu hna pawimawh tak thawk chu chhun dar 12 hma-in pisa kal turin a chhuak ngai meuh lo tih a ni. An pisa dawrtu thingtlang aţanga mi harsa te te lokala, khami ni veka haw leh nghal duh em emte ngaituahna leh ngaihsakna thinlung reng reng a nei lo tihna a nih chu. Chuti chung chuan hlawh sang zawk, DA tihpun tih nawr velah chuan a phusa ber berah an ţang lawi a.
Pathian/Kohhran rawngbawltute hian rawngbawl tlat mai sela, thil dangah inhnukhnawk hauh lovin an rawngbawlna chauh kha hlen sela an va hlawhtling dawn em ti rawh u? Kohhrana Pastor-te aia hlawh hniam fe zawk, ramthim/ramthar a thawktu missionary-te inpekna hi a takin ka hmu tam ve hle mai a, kan chhungte/ţhiante zing ami missionary an awm ve vang pawh ni hmiang. Anni hi chuan (lo inpe tawk lo an awm thei tho na a) an ti tak tak a ni. An thawhna hmun a hrehawm poh leh an inpekna a sângin ka hre mai a. Zahna chibai hi thinlungin tihtak zetin a bûk fo ţhin.
Kan pastor tam tak hi a ram zau zawnga chhutin tunhma ai chuan an bial hi a zim ta hle mai a, mihring chu tam mahse, a fan chhung a rei tawh lova, lirthei an hmang fur tawh bawk. Chuti chung chuan pulpit a sermon thlak, inneihtir leh mitthi vui bak hi an hna a ngai ta lem lo hi an tam khawp mai tih hi mita hmutu leh benga hretu kan nih fur a rinawm. Bial neite’n an bial chhunga damlo leh harsatna hrang hrang neite lenchilh a ţawngţaina an hman chilh hi kan hre tam ta lo em mai!
Hlawh nei lo mah ni sela kohhran mipuiin rawngbawltu atana an thlan kohhran upa ţhenkhat pawh hian an tihtur hi an ti lo khawp hlawm a. Mizo zingah hian sorkar officer hlawh ţha tak hlawhte pawh hian ‘kohhran upa’ a thlan hi hlawhtlinna lian takah an ngai tho tho tih hi tunlai dinhmunah chuan a dik a. A chhan chu kohhran leh khawtlanga zah an phurh em vang a ni ber. Kohhran member-te laka an mawhphurhna hlen ţha tak tak erawh chu an tam viau lo thung.
Khawtlangah hian YMA hruaitu nih hi a hlu-in mi chhoh en an ni hlawm a. Khawtlang ţhatna tur atana Mizo tlawmngaihna chawi nung chunga tha thawh hi hruaitu ţhenkhat chu awm bawk mahse, an tam lutuk lo. Mahni lansarh leh thuneihna nei a inhria a, hruaitu nihna mahni samhmim tihpuarna atana hmang hi kan hmu hnem a. A bik takin central YMA hruaitu ţhenkhat hi chu politics kailawn a hmang, sum hui theihna hmanrua atana hmang, lár khél leh mahni inchhek-arbawmna hmanraw ţha té ni a ngai an ni – an chêt dan han en hian.
Khawtlang nun siamţhat duhna leh kalphung dik lo thlâk duhna aiin engkim mai a intihlar na’na inrawlh peih an ni. Entirna sawi ta ila. Kan ţhalaite’n thawh tur an nei lo ni a kan sawi laiin Karimganj leh Cachar tlangval rual tam tak kan khawite’n hna thawh tur an nei reng a, kan ţhalai hna thawk thei leh chak zawkte hna thawh tum lova smart phone hmanga an phunchiar em em mai ringawt pawh hi ţam hruai a ni tih a chian laiin hna thawk tam tura infuih lam hi kan tlakchhamna lian tak a ni. Vai a nih vanga chief secretary pisa kal tur dan aia kan khawtlang hruaitute an phusa chiam khan an mawhphurhna an hriat lohzia a pholang chiang hle a ni.
Sorkar pawh hi a lui dunga khalhtu awm lo lawngleng vir kual mai mai nena tehkhin a awl ngawt mai. A tihtur a tih loh leh a tih loh tur a tihte hi a tam a ni a. Grep wine man nghek ngawt ai hi chuan kan ram intodelh a sum leh pai lama hmasawnna atana kuthnathawktute ţanpuitu ni zawk ta sela. Sum harsatna awm reng maite hi a chinfel dan tur tih tak taka dap a hun tawh a. Kan ram sum dinhmun (financial condition) hi damdawi ei a dam mai thei a ni tawh lova, a zai a zai (surgery) a mamawh tawh a ni tih hre thei lova an awm hi a pawi a ni.
Finance Commission-in sum min pek tam deuhva zia-awm ve deuh, min pek tlem hret a ţam mai thei reng kan nihna aţanga inkhaichhuah ve hi a hun tawh. Chuta tan chuan kan thawhchhuah ve dan tur hi nasa taka dap a ţul a. State puitling kan nih aţanga kum 35 a ral hnu-ah pawh kan la ngai deuh reng mai hi a zahthlâk a ni. Kan ram pawna kan tharchhuah leh siamchhuahte hralh chu sawi loh kan intodelh loh em avangin kan mamawh tam ber kan la lalut ruih ruih reng a. Sorkar sumbawm tizia-awm turin tu sorkar mahin a takin hma an la ngam lova, chhiah tam tham lalut tura zu dawr hawntir rei ngam an awm hek lo.
Hmunphiattu chuan fai takin phiat sela, ram hruaitu chuan ram leh hnam tana ţha ber turin thawk rawh se. Sum ŭm ringawt mai a kan ram hruaitute leh mipui sum vawngtu sorkar hnathawkte an kal chhûng hi chuan mahni kuang lo nawr kan ni reng dawn. Kohhran hruaitute’n an kohhran mite thlarau nun vei tak takna (passion for soul) nei lova sorkar policy eng eng emaw a inrawlh hi an hna tur emaw an tih chhung chuan kan Kristianna hi a lem leh lemchanna mai a ni reng ang. Kan khawtlang nun inthununna ţha, hnam kan nihna a kan zahawmna humhim leh hnam zahawm nihna lam hawi lova lu tihai thei tawh phawt lo do ve chiam maite hi CYMA hna a nih chhung chuan kan dingchhuak lovang a. Mahni kuang lo nawr hnam kan ni reng ang.
Ram hruaitu leh sorkar thuneitu mahni sum hai kawng tih lohva awmáwl êm êm mai hian thil ţha an thawk chhuak thei lovang. Kohhran leh khawtlang hruaitu awmáwl pawh chuti tho a ni. Mi awmáwl thluak chu Diabawla hnathawhna hmunpui a ni e, an tih ang hian, awmawl phunchiar leh mi rel a sawisel bak hna dang thawk lo kan pung tual tual a. Ţhalaite hnathawh tur siamsak thei zawnga budget her rem lam ngaihtuahtu sorkar kan mamawh a. Chutiang bawkin hna thawh leh intodelh pawimawhna, zahawmna leh ram leh hnam tana thil tih ngei ngei ngai a nihna zirtirtu sakhua leh khawtlang hruaitu hi kan mamawh ngawih ngawih a ni – mahni kuang lo nawr zawnga phe sek ni lovin.