MPCC Vigilance Cell chuan RTI hmanga zawhna Accounts & Treasuries Deptt-in a chhan danah thil dik tawk lo a awm nia an hriat avangin thuneitu sang zawk, Chief Information Commission-ah an zualko.
MPCC Vigilance Cell chuan July 15, 2022 khan Treasury office hrang hranga contractor leh supplier-ten bill an lak dan chipchiar deuha hre tura RTI hmanga zawhna an zawh thu sawiin, an zawhna chu fiah lo taka chhan a nih avangin July 18, 2022-ah thuneitu sang zawkah RTI hmanga an zawhnate chhang ngei tura ngenna an thlen leh hnu, July 27, 2022-ah an zawhna chhanna tur chu Accounts & Treasuries Deptt-in record a neih loh avanga chhan theih a nih loh thu an dawng niin an sawi.
Accounts & Treasuries Deptt-a RTI hmanga an zawhnate chu - Mizoram treasury hrang hranga Rs. nuai 100 chung lam bill nei - contractor leh supplier hming leh address; contract leh supply hna hming; contract leh supply hna estimate zat leh payment pek tawh zat; treasury-ah bill a thlen hnuin ni eng zahah nge pass a nih; E-payment a nih chuan a luhna account neitu hming leh address - tih te a nih thu MPCC Vigilance Cell chuan an sawi.
“Heng kan zawhnate chhanna chu ‘Accounts & Treasuries Deptt-in record a neih loh avangin chhan theih a ni lo,’ tih a ni ta a ni,” an ti.
Accounts & Treasuries Deptt atanga chhanna an dawn chu thu dik lo nia an hriat thu leh bill la tur leh payment an pek turte zawng zawng amount, name of contractor & address fel fai tak treasury officer-ten record an kawl veka an hriat thu leh an chhanna dawn chu thil zep then tumnaa an ngaih thu MPCC Vigilance Cell chuan an sawi.
“Engvangin nge treasury-a bill late lak zat, bill an dawn atanga ni eng zatah nge bill pass-sak an nih tih te hi zep an tum? Engati nge thu dik lova RTI zawhna an chhan tih te hi Accounts & Treasuries department enkawltu, finance minister, chief minister ni bawk, Zoramthanga hi kan zawt,” an ti a. “Tu emaw bill treasury-a tlang bik em em nia an sawi kan chhui mek hi mipui hriat a hlauh vang em ni? An sawi ang hian ama unaute sum a kawl ang khan Kamrul-a nen hian account an lo intawm tak tak em ni tih hi kan zawt nawn a, a department enkawl hian RTI hi dik takin min chhang thuai turin kan phut tlat,” an ti bawk.