South Korean defence minister chuan BTS te chu sipaiah an tang a nih pawhin ramchhung leh pawn lamah show an nei thei tho ang, a ti.
Pianphunga mi pangngai chin tana kar thum atanga kum hnih thlenga sipaia tan ngei ngei ngai South Korea-ah hian boyband lar BTS te pawh an bang bik lova, kumthara kum 30 ni mai tawh tur Jin chungchangah inhnialna a tam a, upa ber a nih vangin boruak pawh a lian hle.
Kum 2019 a tihdanglam, an ram danah chuan K-pop band lar ber BTS te hi kum 30 an nih thlengin sipaia an tan loh remtihsak a ni a, ramchhunga sipai tan leh tan loh chungchanga inhnialna nasa tak awm mek pawh a vung lehzual.
South Korean mipa tawh phawt, pianphunga rualban kum 13 atanga 28 te hian North Korea laka vauna leh tihthaihna awm reng karah an ram tana penchhuak a, sipai tan ngei ngei a ngai bur.
Kum a liam zel a, dan te pawh siam danglam leh siam that hret hret ni chho zein, Olympics leh Asian Games-ah medal la pha leh classical musician te bakah dancer lar tak tak, intihsiaknaa ‘ber’ hauhpha te chu ‘awl’ theih an ni thung.
Hetih lai hian Parliament pawhin K-pop star te tana sipai tan hun chhung pawhtawi dan ngaihtuahin debate an nei mek a, thawhtanni khan parliamentary session-ah Defence Minister Lee Jong-sup chuan BTS te’n show an neih theih tho dan tur a sawi rual hian ramchhunga naupiang tlahniam leh pung hlei thei lo chu ngaihtuahawm tak a nih thu a sawi tel bawk.