India hmeichhe hockey team chuan Canada lakah inkhel hautak takah 3-2 in hnehna an chang a. Commonwealth Games semi-final khel turin an tling.
India chakna goal khungtu hi Mizo nula Lalremsiami a ni a. Fak phu taka khel Canada lakah hian India in chak ngei a mamawh laiin Siami-a’n goal a khung a, India chak nan a tawk.
Nilaini a Birmingham a inkhelah hian India khingpui hi anni aia rankings a hniam zawk nimahsela Canada in chak tumin theihtawp an chhuah a. India tan a awlsam lo.
England laka an tlawm avanga chak ngei mamawh India in bul an tan tha hle a. Goal hnih a hma hruai thuai ni zawk mahse a tir minute 25 chhung vel bak an chungnung lo.
India tan Salima Tete chuan minute 3-naah goal a khung a. Hei hi minute 22-naah Navneet Kaur chuan a chhunzawm.
Canada lamin minute 23-na leh 39-naah Brienne Stairs leh Hannah Haughn hmangin an chhanglet.
An group atanga England an tlin chian tawh avangin India in goal khung leh an mamawh a, na tak takin goal an nawr.
India tan a sir lamah Lalremsiami chu goal nawrna tangkai a ni a, 1-0 a hma an hruai laiin goal khungna hun a neih a hloh hnuah hun pawimawhah a hlah lova. Penalty corner atanga ball kal chu remchangah la in goal-ah a khung.
Siami hi inkhel boruak tang takah huntawp dawnah a inhliam a, inkhel atanga lakchhuah ngaiin a awm a, a nat zawng erawh hriat a la ni lo.