Sorkar sum harsatna avanga chawlhkar khat leh a chanve chhung Mizorama treasury lian ber, Aizawl South Treasury-in sum a pek chhuah tawh loh hnuah nimin atang khan sum hlawm lian lo deuhte chu a pe chhuak leh tan.
Tar lan tawh thin angin finance department thupek angin Aizawl South Treasury-in July 25 atang khan sum an pe chhuak tawh lo a, Aizawl North Treasury pawhin July 21 atang khan an pe chhuak tawh lo.
The Zozam Times zawhna chhangin Aizawl South Treausry Officer Dr. K. Lalnginglova chuan Nilaini atangin sum an pe chhuak leh tan tih sawiin, “Amount erawh lian lo tete a ni,” a ti.
Aizawl South Treausry officer chuan bill an pek chhuah hi finance department atanga pe chhuak tura hriattirna an dawn anga pek chhuah a ni a, “Bill chungchangah chuan finance department lamin release tul a tihte release a ni,” tiin a sawi.
Tar lan tawh thin angin July 22 chho khan Centrally Sponsored Scheme (CSS) sum thahnem tak a pe chhuak a, hemi hnu hian sum harsatna thlengin treasury-te hian bill an pass thei ta lo a ni.