United States chuan an khua leh tuite chu al-Qaeda hruaitu, Ayman al-Zawahiri an thah avanga American-te huatna tharum thawhna a thleng thei tiin fimkhur turin an chah.
Zawahiri thihna hian al-Qaeda tantute leh an zawmpui pawl dangten US hmun leh mi mal pawh an bitum phah thei tih state department chuan a sawi.
Tar lan tawh angin Zawahiri hi Pathianni khan Afghan khawpui, Kabul-ah US chuan drone hmangin a that a ni.
Zawahiri-a hi US beihna, 9/11 attacks an tih bultumtu zinga mi niin mi 3,000 dawn an thih phah a ni.
Kum 71 mi, Egyptian doctor hian kum 2011-a Osama Bin Laden thah a nih hnu atang khan al-Qaeda hi a hruai tan.
Thah a nih thu hi Thawhtanni khan US President Joe Biden chuan puangin Zawahiri hi ‘American khua leh tuite thattu leh an laka tharum thawhna thlentu’ tiin a sawi a ni.
Biden chuan Zawahiri thihna hian kum 2001 beihnaa thite chhungte tan damna a thlen sawt tur thu a sawi a. He beihna hi mi sualten passenger phur thlawhna hruai kawia US-a in pawimawh tak tak an sut kha a ni a; heng zingah hian New York leh Washington-a mi pawh a tel.
Biden-a hian Zawahiri hi October, 2000-a Aden-a USS Cole naval destroyer beihna, US lawng sipai 17 an thihna te, kum 1998-a Kenya leh Tanzania-a US embassy beihna, mi 223 an thihna pawh kha a ruahmantu zingah a tel tih a sawi.
“Department of State chuan July 31, 2022-a Ayman al-Zawahiri-a thihna hian American-te huaa an laka tharum thawhna thlen duhna nasa takin a tipung thei,” tiin an department chuan thu chhuahin khawvel pumah an puang.
“Tuna thu kan dawn chinah firfiak pawlte chuan US thil leh mite chu khawvel hmun hrang hrangah beih tumin ruahmanna an siam chhunzawm zel a ni,” an ti.
“Heng beihna hi kawng hrang hrangin - thihchilha chetna, inthahna, inruk bo, mi hruai kawi leh bomb tihpuah hmangte pawhin a ti thei,” an ti.
US khua leh tuite chu ram pawna an zinnaah inring leh ngaihven taka awmin, a tul ang zela che thei tura inring turin an ti a ni.