Sorkar laipui chuan India hmarchhak state-te zingah zirna sang zawk a awm theih nan an ngaihtuahna an seng niin Union DoNER Minister G. Kishan Reddy chuan Nilaini khan Lok Sabha-ah a sawi.
DoNER minister hian, “Hmarchhak state tinte hian central university an nei theuh va. Manipur-ah pathum leh Assam-ah pahnih a awm,” a ti.
Union education ministry chuan hmarchhakah hian Public Private Partnership (PPP) kaltlangin Indian Institutes of Information Technology (IIIT) pathum lai a lo dah belh tawh bawk.
Tunah hian central university 11, National Institute of Technology (NIT) pariat, Indian Institute of Management (Shillong), Indian Institute of Technology (IIT) (Guwahati), North Eastern Institute of Science & Technology (NERIST) (Arunachal Pradesh) leh Central Institute of Technology (Kokrajhar)-te chu hmarchhaka zirna sang zawk zirna hmunpui awm mekte an ni.
Heng bakah hian Central Institutes of Hotel Management (CIHM), union tourism ministry, Guwahati leh Shillong-ah a awm bawk a. Hetah hian hospitality course hrang hrang zir tur a awm bawk.
North Eastern Council (NEC) General Guidelines 2020-ah pawh hmarchhak state-te chawisanna hi an thil tum berte zinga mi a ni nghe nghe.
NEC hnuaia thil tum 30% vel chu hmarchhak state chhunga tawng hrang hrang, tihdan phung leh chi hrang hrang chawisanna atan leh a hnuaihnung zawkte khai chhuahna atana ruahman a ni. Sorkar pawisa kum thar turah hian Rs. maktaduai 175 chu hmarchhak state-te tan hian dah a ni bawk.
Hmarchhak state hrang hrangte hnam ziarang hausa tak leh an danglamnate humhimna a tan union culture ministry chuan North East Zone Cultural Centre (NEZCC), Dimapur-ah leh Kolkata-ah Eastern Zonal Cultural Centre (EZCC)-te chu a lo din tawh bawk a ni.