Mizoram sorkarin kum 2019-20 tawp lam atanga 2020-21 chhunga sum a dawn tura ngaih dawn loh tam tak a neih nghawng kal zel avanga tuna sorkar sum harsatna thleng ta niin a sawi.
Sorkar sum harsat chungchang sawifiahin Mizoram sorkar chuan COVID19 hluar lai - kum 2019-20 tawp lam atanga 2020-21 chhunga sum hlawm lian chin a dawn loh ringawt pawh Rs. vbc 2,632.58 lai a nih thu a tar lang a. Central atangin sum faia tanpuinate dawng ve bawk mahse, Rs. vbc 100 pawh a tling tha mang lo niin sorkar thuchhuah chuan a tar lang.
COVID19 lengin ruahman lawk lova sum hmanna a tisang a, damdawi in awmsa leh thawktuten an tlin loh avangin hri kai damlo enkawlna atan Covid Care Centre din, voluntary worker rawih, test-na khawl bun, test-kit leh a behbawm tul leina atan te senso a kal tam avangin CSS sumte pawh duh anga hmaa release theih lo chang a awm fo thu sorkar thuchhuah chuan a tar lang a. CSS fund release dan phung tihdanglam a ni bawk avangtein sum harsatna a zual ta niin a tar lang.
Sorkar thuchhuahin a tar lan danin sorkar laipui thu anga Mizoram pawhin CSS fund, March 31, 2022 hma lama dawn tawh, la release lohte chu chawlhkar hnih chhungin Rs. vbc 610.69 chhuah a ni a. Reilo te chhunga heti zat sum chhuah chu sorkar sumin a daih loh avangin ways & means advance/special drawing facility hmangin RBI-ah sum pûk niin, hei pawh hian a la daih loh avangin overdraft hmanga puk a ni bawk.
Mizoram sorkar thuchhuah chuan state dangte pawh sum harsatnain a tibuai hle nia tar langin, Nagaland leh Manipur-te pawh Mizoram aiin an harsa a, Assam pawhin a hunah hlawh a pe chhuak thei lo niin an tar lang a. Sorkar sum dinhmun a chhe rih viau chungin treasury khar ngai khawp erawh a nih loh thu leh July 25 atanga 28 inkarah pawh a tul zual tak bik atan Rs. vbc 17.84 chhuah a la nih thu an tar lang.
Sorkar hnathawkte July thla hlawh chu a hunah pek theih ni ta lo mah se August 10 velah chhuah tum a nih thu sorkar thuchhuah chuan a tar lang a. CSS sumte pek chhuah nghal mai loh leh K-Deposit-a lo dah lailawk a awm thin avanga mi tam takin CSS hnuaia hlawh late hlawh hrensak anga an sawi thin chu a dik lo nia tar langin, CSS hnuaia thawkte hlawh tur bika central-in a release chu K-Deposit-a dah a ni ngai lo va, a rang thei ang bera release nghal zel niin sorkar thuchhuah chuan a tar lang bawk.