Aizawl : AMC, DM&R, PWD, PHE, Police, Geology & Mining aiawhte leh Republic Veng Local Council leh YMA hruaitu ten nimin khan Aizawl Bawrhsap Dr Lalhriatzuali Ralte hovin Republic Veng, Aizawla lei tawlh leh lei che chungchanga hmalak dan tur an sawiho a. Lei che in a tihbuai Lalnunmawia In chu vawiin atanga thiah tan turin an ti.
In thiah hna lo enpui tur hian zonal officer leh structure engineer te an ruat nghal a, khawtlang hruaitute kaihhruainain in thiah hna hi kalpui a ni ang. Thiah hnua hlauhawm la awm thei venna atana tih tur chungchangah AMC chu plan & estimate siama Bawrhsap hnena thehlut turin an ti bawk.
Bawrhsap hova thutkhawmah hian Republic Venga lei che tuartu chhungkaw 36 te hnenah tanpuina sum pek nghal a ni.