Aizawl : Siaha town traffic management committee-in Zirtawpni kalta khan Siaha khawpui chhunga kawngpui dip leh nekchep zawnga thil tih a awm leh awm loh an enfiah leh a. Kawng dipdal zawnga thil dah te chu tun thla 12 aia tlai lova insaseng turin an hriattir.
Tarlan tawh angin Siaha khawpui chhung kawng te nekchep a nih leh nih loh chu nikum khan DC office, SP office, MADC-a concern Deptt - LAD, Road transport, Revenue & settlement etc, Joint VC leh NGO te tangrualin enfiah tawh a. Tun thlenga thupek zawm lo an la awm tih hriat a nih avangin town traffic management committee-in an enfiah leh ta niin sorkar thuchhuah chuan a tarlang a ni.
Siaha Dist. Addl DC Donny Lalruatsanga'n insakna hmun hma in a zir ngang loh avanga inthlahrung tak chunga kaw- ngpuia insakna chakkhai lo dah lailawk te chu an thil dah dan atang pawhin a hriat theih nia sawiin, hriatthiamna thui tak pawh an neih thu a sawi a. Chutiang ni lova, kawngpui chu an ta emaw tia, mipui zahna nei lova kaw- ngpui nekcheptute chu Siaha khawpui tana mi hnawksak an nih thu a sawi.
Kawngpui enfiah tumkhatnaa kawngpui dipdaltute hnena insaseng tura hriattirna order chu kar kalta Zirtawpni khan a tawp tih sawiin, Siaha Addl DC chuan za-a 90 ten thupek an zawm a, thupek zawm lo tlem te an la awm niin a sawi a. Thupek zawma insaseng tawh zingah pawh duhthu la sam lo te a awm thu a sawi bawk.