AIZAWL: Ngopa welfare committee, Aizawl-in lehkhabu an buatsaih -Ngopa History- chu nimin khan Synod Conference centre-ah bialtu MLA, HRD board vice chairman L. Thangmawia’n a tlangzarh.
L Thangmawia chuan “Mizo History ziak kan neih tawhah Mizoram hmarchhak lam history ziak a tlem hle a, Ngopa tlangdung lal ten Zoram tana an thawh hi hai chhuah tur chhuanawm tak tak tam tak a la awm" a ti a. "Tlawmngaihna lama duai bik lo ‘Kawka’ te chanchinte hi Zoram mipui ten an la hmelhriat lo hle a ni” a ti.
Ngopa welfare-in Mizoram hmarchhak history bu rintlak tak mai an tichhuak chu lawmawm a tih thu sawiin, L Thangmawia chuan hah taka zirchianga, Zoram mipuite hnena phochhuah a nih theihna tura rim taka thawktute lawmth hrilhi n, "hei hi Ngopa history chauh ni lovin, Mizoram history keu hawn belhna chhinchhiahtlak tak a ni a, hei hian Mizo history ziaktute ngaihven hlawh thei turin Mizo history-ah bungthar a keu dawn a ni" a ti bawk.
Lehkhabu sawiha- wngtu B. Lalthangliana pawhin “Ngopa tlangdung history-ah thil chhinchhiahtlak tam tak a awm laiin ziak a hlawh lo hle" tiin, "Mizoram hmundanga kan hmuh loh thil ropui tak takte a awm nual a, heng hi lehkhabu ka ziak leh thei a nih chuan ziah tel ngei ka tum a ni” a ti.
He lehkhabu buaipuitu Dr PC. Biaksiama'n “Mizo history bu ziaktu hmasate khan Zoram hmarchhaka Sailo lalte hmalak dan chanchin hi mumalin an lo ziak mang lo tih chu hairual a lo ni lo" a ti a. "An hnu zela ziaktu ten helam hawi zawng hian research an neih belh chuang bawk si lova, a khaw neitu leh veitu ten hma kan lak mai loh chuan helai bial hi history nei lo ang maiin a lo awm reng mai a ni” tiin “heng Sailo lalte hmalakna avangin Champhai road hmar lam zawng, Manipur ramri thlenga ram zau tak Mizorama rinluh a lo ni thei a ni” a ti bawk.