Aizawl: Lunglei atanga Tlabung panna kawngpui, National Highway 302 chhe zual lai thawm tha tura a mawhphurtute nawr nan Commercial Vehicle Joint Action Committee : Tlabung chuan nimin atang khan Tlabung atanga lirthei chhuak tur leh lut tur an dang tan.
Tlabunga sumdawnna lirthei chi hrang hrang neituten an din pawl panga inchhunfinna, Commercial Vehicle JAC hian an lo ruahman tawh angin nimin zing dar 5:30 atang khan an khaw daifem, Sakuhtui bulah NH 302 chu lirthei luh leh chhuah theih loh turin an dang tan a. Kawngpui danna hmunah hian Tlabung police eng emaw zat an duty avangin boruak a muanawm hle.
Nimin lamah Commercial Vehicle JAC hruaitute leh NHIDCL leh kawng siamtu lam aiawhte nen thil awm dan sawi hoin inbe mah se an lungawina khawp hmuh leh hriat an neih rih loh avangin, he thu buatsaih lai thleng hian kawng hi la dan chhunzawm zel an tum a ni.
Commercial Vehicle JAC hruaitute chuan kawng siamtute chu hun rei tak chhung anmahni hriatthiamna nen mipuiten an lo ngaichang tawh thin tih sawiin, an tum tak tak a nih chuan lirtheiten tang loa tluang taka an zawh theih tur tawka a chhe zual lai ringawt thawm nan hun a tam thawkhata an hriat thu an sawi.
Tuna an buaipui lai ber, Sihphirtlang leh Tuichawng inkarah nimin thleng pawhin lirthei thahnem tak an la tang tih sawiin, tha zawka thawm that a nih theih nan, pawl hrang hrangin kawng siamtute chu tum tak tak dawr mah se, tawngkam tha bak dawn an nei ngai lo tih an sawi a, “Kawng dinhmun hi tlanna tlak khawpa ziaawm nia kan ngaih hma chuan tuna kan hmalakna hi chhunzawm zel kan tum,” an ti bawk.