Finance deparment-in pension leh sorkar hnathawk hlawhte chu August 10 velah pek chhuah tum a nih thu an lo puan tawh angin nimin khan treasury-ten hlawh tur sum an pe chhuak.
Mizorama treasury lian pahnih, Aizawl South leh North Treasury hotute chuan finance department-in pension leh sorkar hnathawkte hlawh pe chhuak tura phalna a pek angin July thla hlawh chu an pek chhuak tih The Zozam Times an hrilh.
District danga treasury-te pawhin hlawh tur hi an pe chhuak a, hlawh hi a dawng turte bank account-ah nizan atang khan a lut tan tura beisei a ni.
Aizawl South Treasury Officer Dr K Lalnghinglova chuan sorkar hnathawk hlawh hi pe chhuak mah se bank lamah a lo khawtlai ve thin avangin hlawh hi an account-ah a lut nghal vek lem lo tih sawiin, hemi avang hian thlaphanna tur a awm lo a, tun kar chhoah chuan an account-ah a lut ngei dawn tih The Zozam Times a hrilh.
Tar lan tawh thin angin sorkar laipui thupek anga finance department-in Centrally Sponsored Scheme (CSS) sum, Reserve Bank of India (RBI)-a Mizoram account-a awm sum thahnem tak pek chhuah a nih avangin treasury-ten ni eng emaw zat chu sum an pe chhuak lo a, hemi avang hian sorkar hnathawk hlawh lak chungchangah rinthu leng vak thuthang a tam hle.
Finance department chuan August 4 khan sum chungchang sawifiahin pension leh sorkar hnathawk hlawhte chu August 10 velah pek chhuah tum a nih thu puangin, an lo sawi lawk tawh angin treasury-ten nimin, August 10 khan hlawh tur sum hi an pe chhuak ta a ni.
Mizorama treasury lian ber, Aizawl South Treasury chuan CSS sum thahnem tak an pek chhuah avangin ni sarih chhung sum an pe chhuak thei lo a, finance department thupek angin August 3 atang khan sum an pe chhuak leh a, tunah pawh hian finance department-in bill pass tur a tih chin ang zel chauh an la pe chhuak niin treasury hotuten an sawi.
Aizawl North Treasury erawhin nimina hlawh tur bill an pass bak chu bill dang an la pe chhuak thei lo niin thawktuten The Zozam Times an hrilh bawk.