Mizo Hmeichhe Insuihkhawm Pawl (MHIP) President Ngurmawii Sailo chuan Mizo hmeichhiate zinga social media-a saruaka inpho lang thinte chu MHIP hminga sim turin a ngen tih a sawi.
Ningani khan Thenzawl East VC House-ah MHIP Ramlai Block Conference vawi 7-na neih a ni a. He huna khuallian, MHIP Gen Hqrs President Ngurmawii Sailo chuan thu sawiin, tun lai khawvel hmasawnna sang zelah social media hman thiam a pawimawih a, incheina pawh hmeichhiaten fimkhur a pawimawh tih a sawi.
Ngurmawii Sailo hian Mizo hmeichhe saruak pho lante social media-ah hmuh tur a awm ta chu pawi a tih thu sawiin, “Zolanu, Sawmi Chhakchhuak leh mi dang, saruak thlalak nena social media-a inpho lang thin zawng zawngte sim turin MHIP hmingin ka ngen a ni,” a ti.
MHIP president hian khawvelin a mamawh ber chu a hminga nu mai mai ni lo, nu tling tak tak an ni tih sawiin, “Nute chu chhungkaw hlimna chabi kawltu kan ni a, khawvel siam tha thei kan ni tih kan hriat a, hmeichhiaten kan pawimawhna kan hriat thar zel a tul a ni,” tiin, hmeichhe hamthatna leh dinhmun chawikanna chauh hawi thei an nih loh thu leh fate ngaihsak a ngai a, hengte nena kalkawptir thiam a ngai tih a sawi bawk.
Ramlai Block MHIP President B. Lalengmawii kaihhruai inkhawmah MHIP hruaitu hlun, Padma Shri B. Sangkhumi hnenah chawimawina an hlan.
Inkhawmpuiah hian Vantawng Group YMA hruaitute kaihhruaiin kum 2022-24 chhunga Ramlai Block MHIP hruaitu thar thlan a ni a. Ramlai Block MHIP huam chhungah hian Thenzawl khaw chhung leh khawchheh – Buangpui, Neihloh, Kanghmun South leh Zote South khuaah MHIP branch 15 an awm a ni.