J&K-a hnam thum tan chanpual hauhsak tiam

Union Home Minister Amit Shah chuan Rajouri, Jammu & Kashmir-ah Pahari hnamte Scheduled Tribe (ST) an nih angin an tan zirna leh hnaa an chanpual hauhsak an nih tur thu a puang.

Pahari-te tana quota siam a nih chuan tawng bil neih avanga India-a chanpual hauhsak hmasak ber an ni dawn.

Sorkar laipui chuan parliament-ah Reservations Act chu siam that tumin thil a kalpui mek a ni.

“Sorkarin GD Sharma Commission a din chuan an report thehlutin Gujjar, Bakarwal leh Pahari te tan chanpual hauhsak an rawt a, hetiang hian kalpui a ni dawn,” tiin Shah hian nakuma inthlan lo awm tura BJP tana campaign-a a feh chhuahnaah a sawi a ni.

Shah chuan hetianga hnam pathumte tana chanpual hauhsak hi danpui Article 370 hmanga Jammu & Kashmir voh bik nihna hlih hnuah chauh a awm thei tih a sawi bawk a. “Tunah chuan hnam tlem zawk, Dalit, tribal, Pahari ten dikna chanvo an nei ve dawn ta,” a ti.

Union territory-ah hian Pahari hi nuai ruk vek an awm a, an zinga 55% chu Hindu niin a dang zawng chu Muslim an ni a. Gujjar leh Bakarwal hi ST an nih sa tawh avangin an pualin 10% hauh sa a ni tawh a. Pahari-te ang hian tawng thil avangin Muslim leh Hindu hnam sang zingah chanpual hauhsak tumah an la awm lo niin Shah chuan a sawi.

Shah chuan ST-te chuan ‘engmah chân an nei dawn lo’ niin a sawi a. ‘Mi thenkhatten’ Gujjar leh Bakerwal hnamte chu an ‘tihthaih’ niin a sawi.

Prime Minister Narendra Modi-a’n August 5, 2019-a Jammu & Kashmir hung bikna, Article 35A leh 370 a hlip chu lawm tur an nih thu Shah chuan a sawi bawk.

State ni thin hi UT pahnih — Ladakh leh Jammu & Kashmir-ah then niin Kashmir lam hian assembly member an thlan dawn a. Nakum kum tira inthlang tur hian bial ramri siam mek niin voter list pawh peih tep a ni.

Shah chuan, “Chhungkaw pathum chauh rorelna hmun atanga tal chhuak turin Jammu & Kashmir hi ka sawm cheu a ni,” a ti a. Chhungkaw hming hi a sawi lo va; mahse, Mufti chhungkaw enkawl PDP, Abdullah chhungkaw kaihhruai National Conference leh Gandhi chhungkaw lalna Congress a nih ngei rin a ni.

“Dik taka panchayat leh district council inthlangin thuneihna chu tunah chuan mi 30,000 kutah a awm ta,” tiin village-level inthlan huaihawt a nih tawh thu a sawi lang.

“A hma kha chuan sorkar laipuiin pawisa a pek pawh mi tlem tê chauhvin an chhawr a, tunah erawh khawtlang tan hman a ni ta,” a ti bawk.

Modi-a kaihhruai sorkarin mi firfiakte lakah na taka chet a lak avangin tunah chuan venhimna pawh ‘a tha tawh tak zet’ niin Shah chuan a sawi bawk.

Union minister-in hnam thum tana chanpual hauhsak a tiam chu chief minister hlui, Mehbooba Mufti chuan a hmuna thil nihna tak hre lovin thil an ti mai mai niin a sawi a. “Hetianga chanpual hauhsak hi hnamte tithentu mai chauh a ni,” tiin a sawi.

Mufti-i hi Kashmir-a inthlan hnuhnung berah BJP nen sorkar intawm an siam a, saffron party-in an kalsan hnuah sorkar tluin President’s Rule-ah awmin sorkar pangngai an la nei leh lo.

Leave a Reply

Your email address will not be published. Required fields are marked *

error: Content is protected !!