Zophaia Assam-in an buk sak an thiah leh nghal thu-ah MNF-in CM chhuang

Aizawl: October 2, 2022-a Bairabi Zophaia Assam Police-in buk pahnih an sak, thiahtir leh nghal a nih chungchangah Chief Minister Zoramthanga hmalakna chu chhuanawm an tih thu MNF party in an sawi.

Thuchhuah an siamah MNF party hian Pathiannia Bairabi Zophaia Assam Police-ten buk pakhat an sak thu chief minister-in a hriat veleh Assam chief minister, home minister ni bawk, Himanta Biswa Sarma leh Border Area Dev. Minister Atul Bora te chu be nghalin an thiah loh chuan indawrna kal mek pawh a bahlah theih thu leh boruak tha lo zawk a thlen theih thu a hrilh hnua Assam lam vekin an buk sak an thiat leh nghal tih an sawi.

“Chief Minister Pu Zoramthanga hmalakna hi MNF chuan chhuanawm kan tiin, anmahni buk sak thiahtir lehtu chief minister huaisen tak hi kan chhuang takzet a ni,” an ti.

Bairabi Zophaia Assam Police chetna chungchangah Home Minister Lalchamliana, Kolasib bialtu MLA K Lalrinliana, Forest Minister TJ Lalnuntluanga leh Serlui bialtu MLA Lalrinsanga Ralte te pawhin a tul anga hma an la nghal chu an chhuan thu sawiin, Bairabi NGO leh zirlai pawl lamte pawhin hma an la nghal bawk a, he hmuna duty Mizoram Police chungah lawmthu an sawi.

Thuchhuah chuan, “Mizoram sorkar kan hrawn tawh zingah MNF sorkar tluka huaisen, a hun taka silai hmet puak ngam an la awm lo,” tia tar langin, ramri buai hi political party bakah eng pawl pawhin mahni pawl hming tihthat nan hman tum loa sorkar hmalakna kal mek ngaichanga hnam anga tangrual turin Zoram mipuite a ngen tih a tar lang bawk.

Leave a Reply

Your email address will not be published. Required fields are marked *

error: Content is protected !!