Aizawl lam atanga Khawruhlian khaw luh dawnah tunkar Thawhlehni khan ruah sur nasa avanga leiminin lirthei engemawzat a dang a, a hmatawng bera awm Telecom company motor (Bolero) chu diakah tangin, chhuak tura a beihna lamah a driver Goni Barbhuiya (18), Chandrapur, Cachar, Assam chu a rahna lei chim avanga kawng thlangah thui tak lumin a boral.
Driver a chetsual hnu hian diak tang a motor khalh pawh kawng thlangah a tla a, zan lamah hnuhchhuah leh nghal a ni. Driver Goni Barbhuiya hi an hmuh mai loh avangin Khawruhlian YMA leh mitla- wmngai dang ten an zawng a, nimin chawhma lam khan a tlakna atanga km 1 velah an hmu ta chauh nia thudawn a ni.
Thawhlehni zan vek khan Telecom company motor tanna chu lirthei kal theiha thenfai a nih hnuah Aizawl lam pana kal Thandanga, Armed veng ami car chu Bolero tlakna chhak lawkah chesual ve lehin, a chuang zinga pakhat Lalrinawma (66) Armed veng, Aizawl chu a boral a, car neitu Thandanga bakah midang pahnihin hliam an tuar bawk.
Car chesual avanga boral Lalrinawma ruang chu Khawruhlian YMA Khualbuka lak a nih hnuah Aizawl panpui a ni a. Hliam pathum te pawh Khawruhlian damdawi in panpui an nih hnuah hliam na zual pahnih chu Darlawn atangin helicopter hmanga Aizawl panpui an ni a, hliam pakhat erawh chu Motor-in Aizawl panpui a ni. Thudawn danin an tlakna kawng bal lai hi hung emaw hlauhawm chhinchhiahna engmah a awm lova, chhum a zin deuh bawk avangin car hi a tlanlut ta mai nia ngaih a ni.
Thawhlehni vek khan tlai dar 4 velah Mauchar leh Zohmun inkarah Mauchar nu pahnih – Lalbiaksiami leh a thiannu Laltharpuii te feh haw lam chu kawng chhak lam leiminin kawng thlangah hnawlin Lalbiaksiami zawk chu a boral a, Laltharpuii erawh hliam na lutuk tuar lovin a chhuak thung a ni.