Enivronment, Forest & Climate Change department buatsaiha National Wildlife Week vawi 68-na puala inkawmhonaah YouTuber thenkhatin ramsa man dan an pho lan nasat avangin a tha lo zawngin mi tam tak thinlung mu tawh hnu a kai tho leh nia sawi a ni.
Nimina CWLW Conference Hall, MINECO-a inkawmhonaah mi thiamten Mizorama nungcha dinhmun te, thil siam dangte nena Pathian biak ho tih leh, nungcha humhalh kawnga NGO leh media te mawhphurhna chungchang zirtirna an pe a. He huna sawi a nih danin Mizorama nungcha tam zawk chu ral mai thei leh rem mai thei a nih avangin humhalh an ngai nasa hle.
Tun hnaiah YouTuber thenkhatin ramsa man dan leh pel lai video-te an pho lan nasat avangin, mi tam tak thinlunga thi tawh ramsa pel duhna leh mante an kai tho thar leh nia sawi a ni a. Silai tha tak tak a lo chhuah avang leh neih intihhmuh avangin nungcha humhalh kawngah harsatna nasa zawk a thleng leh mek nia sawi a ni bawk.
Nungcha humhalh kawngah department angin hma lak theih tawk a tlem avangin tlawmngai pawl, kohhran leh media lam pawhin nasa zawka hma la a, an mawhphurhna hre thar tur leh department nena nasa zawka thawhho a tul thu te, nungcha humhalh kawngah nasa taka hma lak ni mah se dan zawm kawngah tan lak thar a tul hle nia sawi a ni bawk.
Nungcha humhalhna chungchang sawihonaah hian kohhran hrang hrang aiawh te, nungcha humhalh kawnga pawl hrang hrang leh tlawmngai pawl te bakah chanchinbumite an tel a ni.
Nimina sawihona êngah rawtna siamte leh hmalakna zel dan tur kawng hrang hrang tar lante chu EF&CC Department nena thawkho chungin hma la chhunzawm zel turin kalkhawmten an rel a ni.
National Wildlife Week hi kum 1954 atang khan kum tin India ram pum huapin October 2-8 chhungin hman thin a ni a, kumin hi a vawi 68-na a ni.
Mizoramah chuan a lawmna pui ber hi October 3, 2022 khan Assembly Conference Hall, Assembly Annexe-ah hman a ni tawh a. Environment, Forests & Climate Change Minister TJ Lalnuntluanga chuan khuallian niin a hmanpui a ni.