- Lallunghnema, Charity Lodge
Consumer Huang hnuhnung berah khan taksa rihna(body weight) tihhniam leh misleading advertisement chungchang ka rawn ziak tawh a. Tunlai khawvel mihring hmasawnna lo sang zelah hian thil thar mak danglam pui pui a tam ta hle a. Awihawm lo khawpa taksa tihchak te, taksa rih zawng kg tam tak taka tihtlem te, hmai mawm leh thim tak tak thiamna hmanraw tha tak hmanga vun tihngo te a tam mai! Hmai bawl chhe ve tak tak, hmai mam ta em em an awm chho ta zel. Ei leh in, zuk leh hmuam in-control avanga lo nalh ta em an awm ta nuk bawk. Thiam thil hnawih avanga lo var ta vur maite pawh hmuh tur an awm ta. Vun lem a awm a, ban lem a awm a, ke lem a awm bawk. Heng zawng zawng hi khawvel thiam thil a ni. Mi thiamte zarah kan lo cher a, kan lo ria ta deuhva, kan lo ngo ta vur mai.
Hetiang karan erawh dawt a, mi bum hmang lemchan thiam te an lo chhuak ve zel a. Hengho hi an ngeiawm khawp mai. Hun reilotea cher an tiam a, hun reilote chhung rihna tihhniam sakahte an intiam a. Mahse an thutiamah an rinawm leh si thin lo a ni. Media chi hrang hrang hmangin sumdawngho an inzuar a, an infak thul. Thil mawi leh nalh, tha leh tlo, belhchian dawl etc. pek an intiam a. Cable T.V leh chanchinbu hrang hrangahte internet-ah te kan hmu thin. Thil tha leh ropui an tiam a, engmah an ni lo tlangpui zel.
Customer-te an bum a, consumer an tihder fo thin. Hetiang style hi sawrkarin a hua a, sumdawnna hlawk taka tih an duh avangin an infak ar ek chiam a, pawisa an hlawhchhuahna a nih dawn phawt chuan misleading advertisement an chhuah chuai chuai a,dawt thu tiam an hreh lo thin a ni. Heng misleading advertisement ti thinho hian nasa takin mipui an rawk a, nasa takin mipui sum an chhuksak a ni. Pawisa eisak bakah mi hriselna an ti chhia a ni. Bungrua, a tha ber ber pek an intiam a, an infak angin an pe leh thei si lo. Hotel neitu tam takin khualzinte tan riahna hahdam thlak, nuam tak pek an tiam a, an pe leh thei lo a nih chuan, hei pawh hi unfair trade practice leh deficiency in service a ni a. Consumer Protection Act 2019 kalh a ni a, thil tisualtu chu hrem theih a ni.
‘Bungrua lei tawh thleng leh theih loh’ tih hi dawrkai leh sumdawng innghahna pakhat a ni a.
Dawrkai tam zawk chuan an cash memo-ahte chuan ,’ thil lei tawh, thleng leh theih loh,’ tih an ziak kalh thin. Keini ve thung erawh chuan ‘bungraw lei tawh a thleng leh theih’ kan ti thung a ni. Consumer Protection Act 2019 sec. 2(47) ah chuan Unfair Trade Practice chungchang a ziak a. Saptawng bawk han hawh leh ila, (min lo hre thiam teh u – llh) CPA, 2019 sec. 2(47) defines the term unfair trade practices which includes – manufacturing spurious goods or providing defective goods not issueing cash memos or bills for the good purchased or service rendered’ tih hi chhinchhiah tur a ni.
Consumer Protection Act 2019 chuan Consumer Commission -te chu bungrua thleng phal lo te chunga action lak theihna thuneihna a pe a. The Consumer Goods(Right to free return) Bill 2015 a awm bawk a ni. Bungraw lei thleng chungchang hi customer te buaina lian ber pakhat a ni a. Dawrkai leh sumdawng duham tam takin an thil hralh thleng an lo remti lo fo thin a. Hei hi dan kalh a ni,kan ti thin. Kan sawi vang ni lovin CPA-in a phal lo mai a ni. Consumer chuan a thil lei chu thleng leh a duh chuan tha taka vawngin dawrkai hnenah a keng tur a ni. Thil lei reng reng a tha lova thleng duh a nih chuan consumer chuan a hma thei ang ber thleng a tum tur a ni. A bungrua chu a khawih chibgpen tur a ni hek lo.A tlangpuiin ni 14 – 30 chhunga thleng tum tur a ni. Thil leina cash memo etc. ken ngei tur a ni. Hei hi evidence atan a tul hle a ni.
Dawrkai lian tak pakhat chuan a hnena thil lei thleng leh a phalsak lova. Kan bungraw kawmah, ‘thil lei thleng leh theih tawh loh’,tih kan tar a lawm, tiin a tangkawh nasa mai a.Ka thurawn a ngaichang a ni..He nu hian Consumer Protection Act a hre lo,consumer right a hre lo vah vah hle mai.
Kei chuan chutiang a nih loh thu ka hrilh a. He thil leitupa hian he dawrkai nu hi Consumer Commission ah a khing ta a. Commission chuan a lo ngaihtuah a, dawrkai nu chu a thil hralh man hu pawisa a chawitir a ni. Dawrkai leh sumdawng te pawh hian Consumer Protection Act 2019 hi zir ve a ngai hle, tih ka hriat phah a ni.
Kum 25 liam ta daih tawh khan kei pawh hian ka thermo flash lei chu a that loh avangin ka thleng ve mai bawk. A tirah an rem ti lova.Mahse,huaisen takin thil awmzia ka sawi chiam hnuin Consumer Forum hnena thlen mai ka duh thu ka hrilh a Chutianga ka vau- khan hnu chuan dawr nghaktu chu a lo nem ta deuhva,pailum thar chu min pe ta hram a ni. Thil lei hman theih loh hi a hlawk lo hle a. Chaw chhum nana lung tum lei ang chauh a ni.
Bungraw lei hman tangkai theih loh thleng leh theih loh tih hian tan chhan (ground) pakhat mah a nei lova.Bungrua thleng tir chu dawrkaiho mawhphurhna a ni.Hei te chauh hi ka han sawi lawk teh ang. Dawrkai nu pakhat chuan an cash memo-ah chuan ‘Damdawi lei tawh hnu a thleng theih tawh loh’ tih an ziak tel kher a. Hei hi consumer-te zak lohna a ni. I thil lei kha a that loh chuan i thleng thei tih lo hre tawh ang che.Harsatna i neih chuan min pun rawh . Consumer Advocacy Group chuan kan pui thei reng che a ni.Fee a ngai lo!
Thu belh: Tawi te tein ziak rawh, ti pawl in awm. I ziak tawi lutuk ti pawl in awm.A changin a tawi ang,a changin a sei ang.A thupui a zir hi a ni thin.In hlawkpui dawn phawt chuan tawi te,tlar hnih khat lek pawh ka thiam a,tlar za tam pawh ka thiam tho.Pathianin rem a tih chuan ka ziak zel ang a,ka sawi zel bawk ang,he consumer chanchin tha hi.Tunah hian Consumer 2020 ka tiral mek zel.Bu tam a awm tawh lo.Min chhiarsaktute hnenah lawmthu ka sawi. Lo consumer hle tawh se,ka va ti em!
Consumer lam ni lo tak lehkhabu KIMNA KAILAWN tih chu ka puahchah mek a.Hetah hian ka maxim ka dah tam mai.Thufing phuah khawm a ni ber.Nun kai hruaitu tha tak a nih ka beisei.
Consumer justice lam hawi lehkhabu 7-na tur chu tunah hian ka buaipui ve leh mek.Consumer right ka buaipui hi ka inchhir lo tak zet zet a ni.Hetiang thil buaipui thei a ka awm hi vannei ka inti zaw mah a, ka hlim em em asin, U Kung!