Suzuka tlankawngah fal takin hnehna a chang a, Red Bull car khalhtu chhuanvawr Max Verstappen chuan karleh lehpek lam a thlir tawh. Mahse a elpui ber chungah second nga hremna kenkawh a ni tih ntlansiak zawha amah kawmtu in a hrilh, a rin loh deuhin a vawi hnih nan Formula 1 world champion a ni.
Pathianni chawhmaah Japanese Grand Prix tlan a ni. He intlansiakah hian Dutch tlangval hian a world title a humhim thei dawn tih hria in bul a tan. Mahse Ferrari car khalhtu Charles Leclerc chuan pahnihna a hauh chuan US Grand Prix a nghah a ngai dawn.
Monagasque driver hi pahnihnaah a tlan thleng ngei. Amaherawhchu lap hnuhnung ber kawi hnuhnung ber dawt a la ngil. Amah hnaih taka umtu Sergio Perez laka chan tha zawk a nih phah a ngaiin race control lamin an hrem a. Pahnihna nimahse a tlan chhung hunah second nga belh niin Pathumna ah a tla thla.
Verstappen hi tun season intlansiak 18 atang vawi 12 pakhatna a nihna niin a kum zawnin a champion. World champion a nih vawi hnihna a ni.
A vawi hnihna chu danglam
A champion hnuah kum 25 mi Dutch racer chuan, “A mak angreng zawk a, rilruah thil tam tak a awm. Kumin kan tan kumtha a ni. World champion han nih leh hi a ropui hle.”
“A hmasa ber khan rilru a khawih hle a, a pahnihna erawh a mawina leh nawmna tak tak a pawh theih zawk. Tunah constructor inelnaah hma kan la hruai, helamah hian kan insawrbing tawh ang. Kan season a la zo lo.” tiin a champion hnuah a sawi.
Tun season a amah eltu ber Leclerc chuan, “Max hi thinlung takin ka lawmpui tak zet. Kuminah champion tura rinkai sa a ni a, kan season hman dan thlirin engtikahnge tih chauh kha zawhna a awm. Kumtharah chuan hma kan sawn anga, kan el phak tak tak tawh zawk kan inbeisei.” a ti.
An intlansiak chungchang sawiin, “Lap nga vel kan tlan zawh hnu atang khan ka tyre a danglam nasa a, kha vang khan ka tlanchak thei tak tak lo. Ka tyre kha a sa chak bik hle a, a tawp thlengin min nghawng ta a ni.”
“Ka laka hremna erawh sawi vak tur ka hre lo. Lap hnuhnung ber tih ka hre lova, mahse hremna kha thutlukna dik a ni.” tiin a sawi bawk.
Super Max
Suzuka International Racing Course-ah tun kartawpah ruahtui a tam thin hle a. Free practice atang tawhin engmah a sawilawk theih loh.
Mahse Inrinni-ah khua tha in FP3 leh qualifying-ah tlankawng a ro a, hetah hian Verstappen a tlanchak thei fal bik hle.
Intlansiak ni ah erawh ruah a sur nasat avangin tlankawng ro nen a inang lo. Intlansiak tan atangin Leclerc nen an inum nghal. Ferrari car tlan chhuak tha zawk mahse Verstappen a brake tlai ngam zawk a, kawi khatnaah a khingpui a pel lehnghal.
Mahse an tlan rei lo. Ferrari car dang Carlos Sainz chetsual avangin intlansiak a khaihlak a, ruah a sur tam avangin an chawl lailawk zui.
Darkar hnih leh minute 15 an nghah hnuah intlansiak chhunzawm tir an ni. F1 danah darkar thum aia rei intlansiak a theih loh avangin lap bituk awm lovin minute 41 an intlansiak tir.
A tir atang Verstappen leh Leclerc an fal. |an hlawh Leclerc-a car-ah tyre a ral chak zawk avangin a um tak tak thei lova, an inkar a zau telh telh a ni satliah lo, Verstappen-a teammate Sergio Perez-a’n a umpha teuh hle. Hei hi a tawpah Verstappen-a champion theih chhan pawimawh tak a ni.
Formula 1 driver thin Jos Verstappen-a fapa Max hian tun dinhmun a F1 driver tha ber a nihna chhan chiang takin a lantir nawn leh. Season tirah a elpui in pakhatna a hauh lai a point hmuh loh vawi hnih a nei chungin a lehpel mai a ni lova, an point a inthlau.
Red Bull team in an car an tihchak fo theih bik thin chu a chhawr bawk, tin, dinhmun khirh tak atanga result tha nei tura a chet theih thin chu fak a hlawhna a ni. Pressure sangah a elpui aiin tihsual a nei tlem a, a team lam pawhin thutlukna siam sual nei lova an thlawp that avangin kuminah tu tan mah el phak tak tak a ni lo.