A mak teh nuai mange! Cotton candy atanga raspberry ice cream doll te thlengin ei theih a ni tawh a, social media-ah thil inchawih fuh lo tak tak nia lang te pawh pho lan a ni zel. Tunah hian India rama tui kan tih em em, Maggi hmangin, ‘cold coffee Maggi’ an siam thar ta reng mai.
Instagram user Chef Kaandi chuan he clip hi dahin, mi pakhatin frying pan-a cold coffee a leih buak lai a lang. Chutah Maggi packet hawngin cold coffee-ah hian a thlak! A chhawm tel bawlhlo nen khan..
A duh tawk mai lo. Capsicum a telh a, purunsun zai lep, coriander leh tastemaker te a phul nuai bawk. Hemi hnu hian coffee powder a telh leh hram. Tichuan, ‘cold coffee Maggi’ chu ei theih turin thleng-ah a chhawpchhuak a, a tawp khar nan he pa hian ketchup a dah zauh bawk.
He video clip hi social media lamah an chuk rawn viau hlawm a, ei tur inchawih lo leh inmil lo tih hriat ngawih ngawih a han mix kual hi tenawm lamah ngai lah an tam. Comment chhiar a hlinawmin, thinrim fe fe lah an tam. Comment pakhatah chuan, “RIP Maggie’ tih a inziak.
Food experiment-ah hian Maggi hi hman lawr leh vawrhchhuah tam pawl tak a ni hrim hrim a. Tunah hian Fanta Maggi, raspberry ice cream Maggi, Maggi milkshake leh Coca-Cola Maggi te chu siamchhuah vek niin, a tui dan erawh a dang viau thei ang.