Aizawl : Aizawl Mayor Lalrinenga Sailo-in Aizawl khawpui chhung faina tura an hmalaknaah an khauh chho zel nia sawiin, dan kalha leivung leh bawlhhlawh paihtute pawh ngaihnathiamna tel lova Rs. 5,000 chawi tir zel an nih thu a sawi.
He thu hi Inrinnia Aizawl municipal corporation huam chhunga faina hapta kharna inkhawm AMC auditorium, Thuampuia neihah Aizawl Mayor chuan a sawi a. Kawng sira leivung leh bawlhhlawh paih ru hriate chuan a proof-na (thlalak) AMC thawktute hnenah thawn thin tura ngenin, dan bawhchhiate chu ngaihhnathiamna tellova hrem zel an nih tur thu a sawi bawk.
Mayor chuan Local council te thuneihna tihsan tum a nih thu pawh sawiin, “Local council te hi kan ring tial tial dawn a, an huam chhunga dan bawhchhiate sum an chawitir tlingkhawm te chu Local council inenkawlna atana hman theih turin dan hnuaiah hmalak kan tum,” a ti.
Krismas boruakah kawn chei tum leh a nih thu pawh Mayor chuan sawiin, a cheina tur sum pawh AMC-in ruahmanna a siam tur thu leh lawmman pawh siam a nih tur thu a sawi.
Aizawl Mayor chuan, “COVID19 hri leng vangin kum 2 chhung krismas leh kumthar lawm theih a ni tawh lova, hri lengin ziaawm lam a pan tak avangin krismas leh kumthar vuakvetah mipuite rilru tih thar leh nan veng hrang hrangah kawn chei kalpui leh tum a ni,” a ti.
Krismas leh Kumthar puala kawn remchang lai chei chu a hma thei anga bera kalpui an duh thu sawiin, November thla laihawl velah chuan kawn te chu vul chuk thei se tih chu an duhdan a nih thu Aizawl Mayor chuan a sawi a. Local council ten an huam chhungah kawn chei an duh a nih chuan AMC-ah ruahmanna an duan te thlenin khawlai chei na tur sum pek an inhuam thu sawiin, “Project angin ruahmanna felfai tak rawn siam se AMC-ah rawn thehlut se ruahmanna kan lo siampui ang,” a ti.
Aizawl khawpui mei mit lova a din champha lawmna hun kumtin February ni 25-ah hman a nih tur thu pawh Aizawl Mayor chuan sawiin, hemi pual hian Aizawl khawpui faina leh mawina kawngah hmalak a ni dawn tih a sawi a. Veng hrang hrang te inelin, nakum Feb 25 ah lawmman tha tak sem a ni dawn tih a sawi.
Faina hapta kharna inkhawm Municipal commissioner Zothamawia kaihhruaiah hian AMC Executive Councillor Laltlanzova Khiangte pawhin thu a sawi bakah, Faina hapta hman chhunga faina kawnga hma la tha Local council 3 – Tlangnuam, ITI leh Chaltlang te hnenah leh Bawlhhlawh thliar hrang tha Local council panga – Upper Republic, Mission Veng, Dawrpui, College Veng leh Tuikhuahtlang te hnenah lawmman hlan an ni bawk.