Anthony Modeste chuan huntawp dawnah goal a khung a, Borussia Dortmund lawmna siamin an tlawm tur daltu goal a khung. Tun kartawpa Der Klassiker-ah Dortmund leh Bayern Munich te 2-2 in an inhnehtawk.
Westfalenstadion a Inrinni zana German club lian pahnih inkhelah mikhual team Bayern Munich hian hnehna an ban pha mai dawn a ang hman hle. Mahse kum 34 mi Modeste chuan goal pawimawh a khung.
Modeste hi tun nipuiah Dortmund hian an striker thar Sebastian Haller a cancer avanga enkawl a nih chhung atana an lakluh a ni a. Bundesliga a striker goal khung thei pangngai tak nimahsela team tha zawk a zawm hnuah beisei angin a che lo thin chuan sawisel a hlawh phah. Nimahsela hun pawimawhah a inlar a, an goal hmasa zawk pawh ama siamsak niin Youssoufa Moukoko chuan minute 74-naah a khung.
Bayern Munich hian goal hnih in inkhelah hma an hruai hmasa zawk a. Midfielder Leon Goretzka chuan minute 33-naah goal khungin second half tan tir lamah Leroy Sane chuan an goal hnihna a khung.
Dortmund hi tunhnaia Der Klassiker hnuhnung pariat a tlawm zawka tang tawh an ni a, mahse an record duhawm lo an titawp thei hram.
Bayern coach Julian Nagelsmann chuan, “Hmahruaitu kan nihlai khan kan goal thumna khung thei ilang chuan engkim a danglam anga, goal pawh an rawn khung ve kher lovang. Mahse kan inven that tawk loh avangin goal kan chhuah a, a tawpah kan tang tluan thei ta a lo a ni.” a ti.