Manchester City in England a an lallukhum humhim tumin ke an pen chhunzawm a. Southampton lakah 4-0 in an chak.
Inrinni zana Etihad Stadium a inkhelah Pep Guardiola star player-te bawk an langsar leh hle. Striker Erling Haaland-a’n City tana a goal 20-na a khung zanah midfielder Kevin de Bruyne chu a khaipa berah a tang a. League match vawi 9 atangin assist vawi 9 a nei tawh.
City tan Joao Cancelo, Phil Foden leh Riyad Mahrez ten goal khat theuh an khung ve bawk.
Guardiola chuan, “Haaland-a’n player hlauhawm neih chu Kevin te ang tan hian thil tha a ni a, goal hlauhawm siam an awlsam phah.” tiin a player-te a fak.
Inkhel dangah Chelsea pawhin an mihual Wolverhampton Wanderers lakah goal thum an khung a, 3-0 in an chak.
Chelsea tan striker Armando Broja chuan a club tana a goal hmasa ber a khung a. Kai Havertz leh Christian Pulisic ten goal hmasa pahnih an khung.