Aizawl: India hmar chhak state-a ruihhlo dan kengkawhtuten Inrinni tlai khan a rualin ruihhlo tihral hun an hmang a. Mizoramah pawh Excise & Narcotics departement-in ruihhlo a hal ral.
Union Home Minister Amit Shah kaihhruaiin union home ministry, Narcotics Control Bureau (NCB)-in Assam Administrative Staff College, Guwahati-ah Regional Conference on ‘Drug Trafficking & National Security’ a buatsaih a. He hunah hian hmarchhak state tin chief minister, chief secretary leh mi pawimawh dangte an tel a, a ruala ruihhlo hal ral hi online-in an chhim a ni.
Hemi denchhena ruihhlo tihral hunah Mizoram END chuan Bethani Multipurpose Farm, Phunchawng-ah ruihhlo man sa, court-a tihfel tawh a hal ral.
Ruihhlo a hal ralte hi heroin kg 18.374, methamphetamine kg 40.594, tramadol gram 643, alprazolam grame 652.760, codeine tel khuh damdawi kg 105.65, ganja kg 88.470, nitrazepam (NAP-10) gram 129.540, pseudoephedrine grame 657 leh lorazepan gram 2.64 te a ni.