Nizan hmasa thimhlim khan Kolkata Strand Road-a office building pakhatah kangmei chhuak vangin mi pakua an thi.
Kangmei chhuaka thi zingah hian kangthelh hnathawktu pali, police pakhat leh Railway Protection Force staff pakhat a tel a, a hmunah West Bengal Chief Minister Mamata Banerjee leh minister thenkhat an thleng nghal.
“Mi pakua an thi a. Police commissioner-in police pahnih dangte pawh an chinchang hriat a la ni lo. Thihna thlen chhan nia lang chu kangmei chhuah laia elevator an hman vang a ni a. Mitthi chhungte hnenah zangnadawmna atan nuai 10 theuh pek an ni ang,” Banerjee chuan a ti.
“Kangmei chhuahna hmun hi railways-te ta a ni a, an mawhphurna a ni. Railways lam hian mamawh laiin building map an nei lo bawk. Chhiattawh laia politics lo rawlh ka tum lo. Amaherawhchu, he hunah hian railways lam changtute tumah an rawn kal lo,” tiin a sawi bawk.
Tlai dar 6:30 vel khan Hooghly River bula New Koila Ghat Building chhawng 13-na atangin kangmei hi a chhuak tan a, helai hmun hi Eastern Railway leh South Eastern Railway-ten pisa atana an inhman tawm a ni. Kangthelh motor 25-in thelh tumin theihtawp an chhuah a ni.