National Games 2022 neih laiah Inrinni khan Lalhumhimi chuan Judo a kg 52 rihna huangah gold medal a la.
Zemabawk North nula Humhimi hian, a match hmasa lamah Gujarat, Madhya Pradesh leh Haryana te chu full point hmangin a hneh vek.
Final-ah Delhi aiawhtu nen an inhmachhawn a, gold medal inchuhnaah pawh hian chiang takin a chak.
Pu Chuaubuanga fanu Lalhumhimi hian tun hmain senior national-ah gold medal pakhat leh bronze medal pathum a lo la tawh a ni. All India Police Meet-ah pawh bronze medal a la tawh bawk.
National Games tak erawh a vawi khat khelhna a ni a, inelna a hmachhawn hmasak berah Mizoram tan medal hlu tak a hlawh chhuak nghal a ni.
Mizoramin gold medal a lak hnu hian, Sports Minister leh Mizoram Olympic Association president ni bawk Robert Romawia Royte chuan, “Lalhumhimi’n Judo huanga National Games gold medal a la hi Mizo hnam tan a lawmawm tak zet. National Games hi National Championship a ti thate inelna a ni a, a tel phak nih ringawt pawh a harsa. Chutiang a nih laia gold medal lai a la hi a ropui hle.
“Mizoramin Incentive Scheme kan neih angin gold medal latu hi Rs 6,00,000 pek a ni dawn a, bronze medal latu Zakhuma pawh scheme kan neih sa angin Rs 2,00,000 pek a ni bawk ang.” a ti.
Judo-ah hian Inrinni khan ZD Lalnuntluangi (-57) pawh a inlan a, a match hmasa berah Jammu & Kashmir mi chu full point in a hneh. Match hnihnaah Haryana aiawhtu nen inkhel in, a dar a ti na a, inkhel tluan mahse a dar hliam vangin vanduai zawkah a tang.
Vawiinah hian Judo bika Mizoram aiawhtu dang Lalnilawmawmi (-48kg) a inlan ve thung dawn a ni.
Mizoram Judo team hi coach F. Vanlalruala, Republic Veng leh manager C. Vanlalruati, Mission Vengthlang ten an hruai.
National Games 2022 neih laiah hian tun dinhmunah Mizoram hian medal pahnih an la tawh. Humhimi hma hian weightlifter Zakhuma chuan bronze medal a lo la tawh bawk.