Moscow-in Crimea-a governor atana a dah, Sergei Aksyonov chuan an inkalpawhna pui ber beih a ni chu phuba lak an châk hle tih a sawi a, hetih rual hian lei a chhiat chhunga hman turin thla hnih daih tuialhthei leh thla hnih dang daih ei tur an khawl sa tih a sawi.
“Kan insiam rem a, buaina lian tak a ni lo,” a ti.
Crimean bridge hi Russia tan chuan politics zawnga a hlut bakah Crimea hi an ram a ni tih an lantirna pakhat a ni a. Ukraine-in an awp chin atanga mel 100 vela hla ni mah se Russian thuneitute chuan a hma khan boruak, lei leh tuipui atanga beih theihna lakah an ven nasat thu an sawi tawh thin.
Russian national anti-terrorism committee chuan truck bomb tihpuah leh a bula rela tuialhthei phur a kan vanga chhiatna thleng niin a sawi a. An chhuinaa Russia chhim lam, Krasnodar region-a mi pakhat in dap a nih thu an sawi.
Ukraine chuan an sipaite an inrawlh thu an la sawi lo va; mahse, tun hmain Crimea hi an lo bei fo tawh a. Thla hmasa pawh khan Crimea-a thlawhna atanga Russian sipai hmun, Saky military base beihna pawh an tih niin an sawi.
Inrinnia lei beih hnuah khan Ukraine-ah chuan social media-ah lawmna thu nasa taka inthawn darh a ni a. An bank lian ber pahnihna chuan debit card design thar, lei chim behchhana siam an tichhuak zui nghal nghe nghe.
Ukrainian thuneitu, Zelensky-a party-a parliamentary head David Arakhamia chuan, “Russian-ten dan lova an din chu a chim a, kangmeiin a man mek,” tiin a sawi.