Aizawl: Land Owners’s Association (Vairengte-Kawnpui, Package 3-6 NH 06 & 306)-in ni 13 chhunga sorkarin an thil phut ang a tihhlawhtlinsak lo a nih chuan Vairengte atanga Mizoram châk lak luhna kawngpui danchah an tum.
Thawhlehni khan Kolasib-a Land Owners’ Association hruaitute an thukhawm a. He thutkhawmah hian Mizoram sorkarin an harsatna tawh mek, land owner-te hnena zangnadawmna pawisa sem thei loa hun rei tak awm mek chu, October 11-24, 2022 chhunga a pe chhuak lo a nih chuan Mizoramin châk a lak luhna kawngpui danchah (road block) an rel a ni.
Land Owners’ Association chuan an chanvo atana sorkar laipuiin zangnadawmna sum a pek chhuah tawh, July 8, 2022-a Competent Authority of Land Acquisition (CALA) account-ah transfer tawh chu sem a nih thuai theih nana tum thum sorkarah an dawr tawh hnuah leh Mizoram sorkar hnuaia committee sang (GAD meeting) pawhin tum hnih sem tura thutlukna a siam tawh, a dawngtu turten hming pawh an ziah hnan vek tawh bakah ram pass original pawh an theh luh vek tawh chu tun thlenga sorkarin a la pe chhuak thei lo chu hriatthiam har an tih thu an sawi.