India-a damdawi lam thuneitute chuan tun hnaia Gambia rama naupang tam tak thihna nena inzawmna nei nia hriat khuh damdawi pali chu a siamtute hnenah siam chhunzawm tawh rih lo turin a hriattir.
Maiden Pharmaceuticals hian ‘an siam dan leh an enchhinnaah dan zam an bawhpelh’ tiin India-a damdawi viltute chuan an sawi a ni.
World Health Organization (WHO) chuan Maiden-in khuh damdawi pali an siamte hi naupang 70 dawn thih chhan a ni thei nia ngaiin khawvel puma hmang rih lo turin thu a lo tichhuak tawh a ni.
Damdawi leh naupangte thihna inzawm dan hi India leh Gambia-ah hian chhui zui mek zel a la ni.
India-a damdawi viltute chuan New Delhi-a hmunpui nei firm hian a himna atana dan zawm eng emaw zat an bawhchhia tih hmuh a nih hnuah an thil siam chu chawlhsan rih turin an hriattir tih an sawi.
“Hei hi a chhui kalpui a awlsam zawk nen leh a that dan, a himna leh damdawi in a thawh ang hriat chian a nih zawk theih nan a ni,” an ti.
Maiden hian hemi chungchangah hian engmah an la sawi ve rih lo thung.
Kar hmasa lamah erawh kha chuan company hian chanchinbua anmahni kaihhnawiha thihna thleng an lo hriatin pawi an tiin a barakhaih hle tih an lo sawi tawh thung.
WHO-in Maiden-in khuh damdawi an siam palite hian naupangte kal khawih hliamin July, August leh September-a thihna tam tak kha hei vang nia an hriat thu an puang a, khawvel chu fimkhur turin a hriattir nghal a ni.
Khawvel huap hriselna viltu pawl hian heng damdawite hi ‘thil inlei dan pangngai bak pelin Gambia ni lo ram dangah pawh sem darh’ a nih thu a sawi bawk.
Heng damdawite hi Promethazine Oral Solution, Kofexmalin Baby Cough Syrup, Makoff Baby Cough Syrup leh Magrip N Cold Syrup te an ni.
Gambia-a police-te pawhin naupangte thihna hi an chhui zui ve mek a, mipuite chuan an tan dikna hlen chhuah ngei an phut.
President Adama Barrow chuan ‘a mawhphurtu chu hrem lovin an chhuah dawn lo’ tiin a sawi tawh bawk.
Thawhlehnia police-in an chhui tawhna chin report an tihchhuahah chuan heng khuh damdawite hi Africa khawthlang lam ramah hian US-a hmun nei company-in an chawk luh a nih thu an sawi.
Report-ah hian hetiang damdawi bottle 50,000 zet lak luh a nih thu leh a tam zawk chu man a ni tawh tih an sawi bawk.