Aizawl: Rs. 65,74,500 senga sak, Thingsai Police Station building thar chu nimin khan bialtu MLA Dr R Lalthangliana, Health Minister-in a hawng.
Hawnna inkhawmah thu sawiin Dr R Lalthangliana hian MNF sorkar hmasaah police battalion pali an lak hnuah Congress sorkar kum 10 chhung khan lak a nih loh avangin theihtawp chhuaha police indaih lohna sutkian tuma hma an lakna chu hripui leng vangin an tihlawhtling thei lo erawh pawi a tih thu a sawi a. “Burma nen km 400 chuang leh Bangladesh nen km 300 chuang kan inri a, a changin ramri a buai a, hengah hian police hi kan mamawh belhna a nasa a ni,” a ti.
Khualzanah Devesh Chandra Srivasta, IPS, Director General of Police, Mizoram pawhin thu sawiin police hna ruak tam tak hnawhkhata police indaih lohna hi cabinet-ah thlensak tur leh police building chhe tam takte thuam that kawngah theihtawp chhuaha hma laksak turin bialtu MLA a ngen.
Hawnna inkhawm hi Lallianmawia, IPS, Deputy Inspector General of Police, Southern Range-in a kaihruai a, Lalbiakkila, MPS, SP Hnahthialin lawmthu sawina hun hmangin inkhawm a khar a ni.
Thingsai Police Station building hawnna neih zawh hian MNF Adviser Dr R Lalthangliana’n Thingsaia martar hriatrengna lungphun a hawng nghal a. He thlanah hian Mizo hnam martar pariat phum an ni.