Zirlai nih chuan thupui eng emaw ber hmangin essay kan ziak thin kha a ni a, kha subject bika kan hriatna zau leh zau loh fiahna bakah, reading leh writing skill fiahna tha tak a ni bawk. Tunhnai mai khan mark 10 pu, ‘Inneihna’ chungchanga essay ziah chu social media-ah a darh hluai mai a, Social Studies Exam paper-a a chhanna hi dawnsawn dan a inag lova, nuihzatthlaka la an awm laiin, tha ti lo fe fe pawh an tam.
Heti ang hian
“Inneihna hi a hmeichhe zawk nu leh pate’n, ‘Nula puitling i ni ve uai tawh a, chawm theitu tur che i zawn a ngai ta’ an tih atanga intan a ni a,” a tih hnu ah, “A hmeichhia zawk chuan amah ang bawka nu leh pa te tur chhuah mipa chu a hmu ve ta a.
“Khawngaih takin, nangpawh i puitling ve uai tawh a nia. Tichuan an pahnih hian an in test ta a, an hlim ta em em a. Chen dun an thlang in, fa nei turin thil awmze nei lo tak an ti ta a ni,” tiin a ziak.
An zirtirtu ngiahdan leh pawmdan a ni hauh lova, mark 10-ah zeo a pe chiang hle. Zirtirtu chuan a essay ziah chu ‘atthlak’ takah a ngaihsak a, remark-ah chuan, “See me” tih thuziak a hnutchhiah zui bawk.
He essay hi social media hmangtute chawtui tak a ni mek a, an khel ngat ngat mai. Ngaihdan a phir hlawk a, pawm dan a dang nuai nghal bawk. Tawngkam na tak tak hmanga comment a awm laiin, nuihzatthlak lama la a, nuihpui te lah an tam.
“Zirlai chhanna hi a duhawm riau,” ti an awm a, ‘A nuihzatthlak kher mai a’ tih te a awm bakah, ‘A chhan dan chu a innocent hle mai,” tih te chu comment-ah hian a tha lam zawnga an dawnsawn dan thenkhatte chu a ni.