Maharashtra forest department chuan Ningani khan Gadchiroli leh Chandrapur district-a mi 13 lai thattu nia an sawi, ‘sakei buaipuiawm tak,’ CT-1 an tih chu kap muhilin an man tih thuneitu sangin a sawi.
Sakei hi Gadchiroli chhunga Wadsa forest range-ah lutin mihring nunna atan a hlauhawm niin a sawi.
“Chandrapur district-a Wadsa-ah mi paruk, Bhandara-ah mi pali leh Brahmapuri forest range-ah mi pathum a tihlum a. Principal Chief Conservator of Forests (Wildlife) Nagpur chuan October 4-a thutkhawmnaah CT-1 hi man turin a ti ta a ni,” a ti.
“Man tura thupek bawhzuiin Tadoba Tiger Rescue team, Chandrapur, Navegaon-Nagzira leh hmun danga Rapid Response Team chuan man tumin beihpui an thlak nghal a. Ningani tuk khan Wadsa forest range-ah kap muhilin man a ni ta a ni,” a ti.
An manna hmun atanga km 183 vela hla, Nagpur-a Gorewada Rescue Centre-ah lak nghal niin enkawl zui a ni.
India ramah hian sakeite hi an no mansak tum nia an ngaih mihring bei thin emaw, anmahni nunna inhum nana bei thin emaw hi ‘buaipuiawm’ an tih huanga an dah thin a ni.