Larsap Hari Babu Kambhampati-a’n ni hnih chama Saitual district tlawh turin nimin khan Saitual a thleng a. Sorkar office hrang hranga hotute, bank hotute, political party hruaitute, kohhran hruaitute leh tlawmngai pawl hruaitute a kawm nghal.
Mizoram Larsap chuan faina kawngah Saitual district-in state pum huapa inelnaa district fai ber dinhmun an hauh thei chu chhuanawm a tih thu a sawi a. Zirna lam, kawlphetha dinhmun, tui in tur sem chungchang, MNREGA hmalakna, Agriculture, Horticulture, UDPA hnuaia hmalakna leh agriculture huanga hmalaknate deptt. hotute chu zawtin, tanlak tulna lai te a sawipui a, mipui tana theihtawp chhuah zel turin a chah.
Sorkar laipui scheme hrang hrang mipuiin an tangkaipui dan tur te Larsap chuan a sawi uar hle a. Mi tam tak a lo kawm tawh atangin sorkar laipui scheme te chu mipuiin an hre chiang lo hle nia a hriat thu sawiin, a hlawkna tel thei pawh an la tlem hle niin a sawi.
Mipuite hnenah social security scheme chungchang te chu chiang taka hrilhfiahtu awm se mi zawng zawngin zawm vek duh a rin thu Larsap chuan a sawi a. Banker te leh concern official ten mipui zirtirna pe tura nasa zawka tan an lak a ngai tih sawiin, a bikin banker te chu tan la zual turin a chah.
In sak tanpuina, Gas connection neih theih dan leh central scheme dang tam tak khua leh tui te zinga khawsak harsa ten an tangkaipui tur, an la hriat chian si loh a awm nual thu sawiin, official ten tan an lak a ngai tih a sawi a. Beneficiary ten scheme hmanga hlawkna an tel theih nan official te pawhin tihtur tul te dah khawmuang lova, central lama nawr ngai te pawh an nawr zung zung a ngai tih a sawi bawk.