Aizawl : MNF Adviser Lalchamliana, Home Minister chuan MNF chu an fel bik vang pawh ni loin, a thlaktu tur tha dang party an awm lo chu Pathianin mal a sawm lehna tur kawng nia a hriat thu a sawi.
Ningani-a MNF Hrangturzo Joint Block Conference-ah khuallian niin MNF Adviser Lalchamliana’n a hman pui a. Thu sawiin, MNF party chu hruaitu inlungrual, peng kawi ve lo, dinna ngheta ding tlat, hnam rilruin a hruai tlat hruaitu neih an nih avangin, an hruaina hnuaia an sorkar leh ngei dawn tih a sawi.
Hrangturzo bialtu MLA chuan kum 2023 MLA inthlanpui hmain kum khat vel hun an la nei a, sorkarna siam tawhte’n term hnih an chelh deuh zel a, aia rei chelh erawh an la awm lo tih sawiin, “Kan sorkar leh ngei ka beisei tlat a ni,” a ti.
Lalchamliana hian tun hma atangin Mizoramah regional party lian tak hi a awm thei lo tih sawi a. Congress chu an tlahniam viau a, an tlakhniamna atanga tho chhuak a, hmasawn se a duhpui tih a sawi a. Hetih lai hian, pawl hrang hrang din leh zuang sawn reng chungah mipuiin rinna an ngah a rinawm loh avangin, MNF hi an fel bik vang pawh ni loin, a thlaktu tur party tha dang an awm hrih lo chu Pathianin mal a sawm lehna tur kawng nia a hriat thu a sawi.
He huna khual zahawm Lalruatkima, MNF Adviser chuan MNF sorkar an sorkar hun rei lo te chhungin hmasawnna tam tak ram chhunga thleng mek hi chhuan tham a awm tih a sawi.
Hrangturzo Block Joint Conference-ah hian resolution pali an pass bawk a ni.