ZPM thalaiin pensioner mi 1367-te GP fund hren mek leh state healthcare scheme hnuaia damlo inenkawlna senso ba tam tak awm chu kumin chhung ngeia pe chhuak turin sorkar an phut.
ZPM thalai hruaitute chuan nimin khan Aizawl Press Club-ah thuthar thehdarhtute kawmin Senior Vice President Dr C Lalrammawia’n Mizoram sorkar atanga pension hlim mi 1367-te GP fund Rs 2,49,87,07,426 chu Mizoram sorkarin a hrensak niin a sawi a. Pensioner-te mangangin union finance minister hnenah SOS lehkha thawnin an harsatna an thlen niin a sawi.
ZPM thalai senior vice president chuan, “An thatlai hun zawnga sorkar hna an thawh hlawh, an dah khawlte hrensak an ni hi pawi kan ti a, union finance minister hnena an zualko hialte chu mualphothlak kan ti,” tiin, pensioner-te GPF tang mek chu kumin chhung ngeia pe chhuak turin Mizoram sorkar an phut thu a sawi a ni.
Dr C Lalrammawia chuan Mizoram State Healthcare Scheme hnuaia inziak lut, damlote inenkawlna sum tam tak bat khawl a ni pawh pawi an tih thu sawiin, nikum aia kumina healthcare scheme-a inziak lut zaa 45 zeta a tlahniam chuan MNF sorkar mipuiin an rin tawh lohzia a tar lang chiang hlea an ngaih thu a sawi.
Healthcare scheme hnuaia damlo inenkawlna bill ba chu kumin chhung ngeia pe chhuak ngei turin sorkar an phut tih a sawi.