September thla khan Delhi sorkar chuan halpuah leh halmawi khapna hi a lo tichhuak tawh a, hei hian January 1 thleng atana a siam, a zawrh leh hal a khap a, a hma kum hnihah pawh hetiang bawk hian khap a lo ni tawh.
Environment Minister Gopal Rai chuan Nilaini khan lo kawl emaw, hal emaw chuan Rs. 5,000 thleng chawi bakah kum thum lung in tan a hmabak thei tih a sawi.
Sorkar chuan halmawi hal leh hal loh vil tura thupek kengkawh turin team 408 a siam thu a sawi a, heng zingah hian police bakah pollution officer an tel a. He thu a puan hnu lawkah hian police chuan halmawi kg 2,200 chuang zet an man nghal tih Times of India chanchinbu chuan a tar lang.
Minister Rai chuan, “Khapna chungchanga vantlang inzirtirna pawh October 21 atang hian kalpui a ni ang,” a ti.
Sakhaw hunpuia halpuah leh halmawi khap chu mi tam takin an sawisel zui nghal a, a dik tawk lovin mi hremna nia sawi pawh an awm a. Thenkhat phei chuan ‘Hindu dodalna’ ang hialin an chhuah a. “Engvangin nge Hindu kut chauhvin boruak a tihbawlhhlawh bik, Delhi-ah darkar 3-4 vel hal hian eng pawi fakau nge a khawih bik?” tiin social media hmangtu pakhat chuan Twitter-ah a tar lang.
Kum eng emaw zat chhung chu India ramah hian Diwali laia halpuah leh halmawi hal hian sawi a hlawh tawh a, Hindu tam tak chuan khap ringawt hi inthliarna niin an ngai a. Milar tam tak, halmawi khap duh lotute pawhin khapna hian sakhuana thil a khawi nia an ngaih thu an lo sawi hlawm tawh a ni.