Mizoram Pradesh Congress Committee (MPCC) chuan sorkar flagship programme, SEDP sem chungchangah khaw thenkhata a dawngtute hnen atangin MNF party-in pawisa an chhuhsakah an puh.
Nimina an thuchhuahah MPCC chuan Education Minister Lalchhandama bial, Tuivawl chhunga khua – Sakawrdai, Zokhawthiang leh Vaitin-ah te chhungkaw 200 chuangin SEDP Rs 25,000 dawngin, MNF party hian sum dawngtu chhungkuate hnen atangin Rs. 500 zel chhuhsakah an puh a. SEDP dawngtu N. Khawdungsei-ah chhungkaw 13-te pawisa Rs 1,000 theuh, Tinghmunah chhungkaw 60-in dawngin Rs. 1,050 zel, Mauchar-ah chhungkaw 70 chuangin dawngin MNF-in Rs 100 zel an chhuhsak bakah, New Vervek-ah pawh SEDP sem leh hunah chhuhsak ve ngei an tum thu MNF hruaituten an sawi tih an tar lang.
MPCC hian Zoramthanga kaihhruai MNF sorkar hian an intiam anga SEDP Rs nuai 3 pawh sem thei lo a, an intiamna hmun sawma thena hmun khat pawh tling lo, Rs. 25,000-in an sem theih hram laia an intiam zat hmun 10-a thena hmun khat pawh an sem theih loh laia pawisa dawng awm chhunte pawisa dawn atanga sum eng emaw zat MNF party-in an la chhuhsak duh hi mak an tih thu leh, SEDP dawngtu chhungkuate leh Mizoram mipui hmusitna dik takah an ngai tih an sawi.
Congress party hian, “SEDP pawisa sem hi MNF party pawisa a ni lo a, sorkar pawisa, kan chhiah pek tlingkhawm, Mizoram budget chhunga mi ngei a ni tih hi Mizoram mipuiin kan hriat a ngai. Chuvangin, kan chhiah pek tlingkhawm atanga MNF party-in an duh zat zat an tham then ringawt mai hi hriatthiam theih a ni lo,” an ti.